Watu 40 watoweka baada ya boti ya wahamiaji kupinduka Italia

Mwakilishi wa shirika la Umoja wa Mataifa linalowahudumia wakimbizi la UNHCR nchini Italia Chiara Cardoletti, amesema ajali hiyo ilitokea siku ya Alhamisi na mtoto mmoja mchanga ni miongoni mwa waliotoweka.

Msemaji wa shirika la kimataifa la uhamiaji, IOM Flavio Giacomo, amesema boti hiyo iliondoka kutoka Sfax nchini Tunisia na ilikuwa imebeba wahamiaji 46 kutoka Cameroon, Burkina Faso na Ivory Coast.

Giacomo ameongeza kuwa boti hiyo ilipinduka kutokana na upepo mkali na mawimbi makubwa, na kwamba baadhi ya walionusurika walipelekwa Lampedusa huku wengine wakirudishwa Tunisia.

Miongoni mwa waliotoweka ni wanawake saba na mtoto mdogo. Watu wote walionusurika ni wanaume. Giacomo amesema pia kuwa tangu mwezi Novemba, wameshuhudia kuwasili kwa wahamiaji wengi kutoka Kusini mwa Jangwa la Sahara kupitia Tunisia.