Rais wa Bolivia akanusha kuhusika na jaribio la mapinduzi

Katika hotuba yake ya kwanza mbele ya waandishi wa habari tangu jaribio hilo la mapinduzi lililoshindwa, Arce alisema madai kuwa alijipangia mapinduzi ni uwongo, akiongeza kuwa yeye sio mwanasiasa anayetafuta uumarufu kupitia damu ya watu.

Arce alizungumza saa kadhaa baada ya serikali yake kutangaza kuwa jumla ya watu 17 wamekamatwa kwa kuhusika katika jaribio hilo la kuiangusha serikali, akiwemo mkuu wa majeshi, Jenerali Juan Jose Zuniga, na Kamanda wa zamani wa Jeshi la Wanamaji Juan Arnez Salvador.

Rais Arce alidai kuwa sio tu maafisa wa kijeshi walihusika katika mpango huo, lakini watu waliostaafu kutoka jeshini na mashirika ya kiraia. Hata hivyo hakufafanua madai hayo. Amesema Zuniga atachunguzwa na kukabiliwa kisheria. Hapo jana baadhi ya wafuasi wa rais huyo walifanya maandamano nje ya ikulu kuonesha uungwaji mkono.