Kenya iko tayari kupeleka kikosi kuisaidia Haiti

Waziri wa mambo ya kigeni wa Kenya Alfred Mutua ameyasema hayo Jumamosi jioni na kuongeza kuwa maafisa wake wako tayari kutoa mafunzo na kusaidiana na polisi wa Haiti ili kurejesha utulivu.

Soma zaidi: Baraza la usalama la UN lahimiza msaada wa usalama kwa Haiti kukabiliana na magenge

Hata hivyo Mutua amesema pendekezo hilo la kuisaidia Haiti bado linatakiwa kukubaliwa na Baraza la Usalama la Umoja wa Mataifa na kuidhinishwa na mamlaka za ndani.

Haiti, imekuwa ikikabiliwa na mizozo ya kiutu, kisiasa na kiusalama huku makundi ya uhalifu yakidhibiti sehemu kubwa ya mji mkuu Port-au-Prince.

Soma zaidi: Guterres atoa wito kwa jumuiya ya kimataifa kuyapa kipaombele mahangaiko ya watu wa Haiti

Mapema mwezi huu, katibu mkuu wa Umoja wa Mataifa Antonio Guterres alisema  vurugu zimeendelea kupamba moto na kusambaa nchini humo, huku kukiwa na vitendo vya  mauaji, ubakaji, uporaji na maelfu ya watu wamelazimika kuyahama makazi yao.