جرمنی: فٹ بال پارٹی، تین زخمی، حملہ آور ہلاک

جرمنی کی مشرقی ریاست سیکسنی انہالٹ میں فٹ بال ٹورنامنٹ یوروپین چمپیئن شپ 2024ء کے افتتاح کے موقع پر ایک نجی پارٹی میں ایک شخص نے متعدد افراد پر چاقو سے حملہ کیا۔ اس حملے میں تین افراد شدید زخمی ہوئے۔ پولیس نے بعد ازاں حملہ آور کو گولی مار کر ہلاک کر دیا۔

سیکسنی انہالٹ صوبے کے دارالحکوت ماگڈے بُرگ کے نزدیک واقع شہر وولمیراسٹیڈ  میں جمعہ 14 جون کی شام یورپی فٹ بال چیمپیئن شپ  2024 ء کا پہلا میچ ایک نجی پارٹی میں دیکھا جا رہا تھا۔ جرمنی اور اسکاٹ لینڈ کے درمیان یہ میچ جرمنی کی جنوبی ریاست باویریا کے دارالحکومت میونخ کے مشہور زمانہ فُٹ بال اسٹیڈیم میں کھیلا جا رہا تھا۔

جرمنی کے بِلڈ اخبار نے پولیس کا حوالہ دیتے ہوئے کہا ہے کہ حملہ آور اس عمارت  میں داخل ہوا جہاں یہ پارٹی ہو رہی تھی اور حاضرین پر چاقو سے وار کیے جس کے نتیجے میں تین افراد زخمی ہوئے۔ زخمیوں کی حالت تشویشناک بتائی جاتی ہے۔ بلڈ کے مطابق دو افراد بہت بری طرح زخمی ہیں۔

اخبار بلڈ کی اطلاعات کے مطابق چاقو حملہ کھیل کے آغاز کے چند منٹ بعد ہوا۔ پبلک پراسیکیوٹر کے دفتر کے مطابق حملہ آور نے ایک اور قریبی مقام پر ایک شخص کو چاقو کے وار کا نشانہ بنایا تھا۔

حملہ آور کو بعد میں پولیس نے گولی مار کر ہلاک کر دیا۔ بلڈ اخبار نے پولیس کی ایک خاتون ترجمان کا حوالہ دیتے ہوئے رپورٹ کیا کہ مذکورہ شخص جائے وقوعہ پر پہنچنے والے پولیس افسران کی طرف بڑھا جس کے بعد ''آتشیں اسلحہ استعمال کیا گیا۔‘‘

پولیس کی خاتون ترجمان نے اس امر کی تصدیق کی کہ مجرم گولی لگنے کے بعد ''ہسپتال میں دم توڑ گیا۔‘‘

پُر امن افتتاحی میچ

میونخ اسٹیڈیم میں جمعے کی رات ہونے والا  یورو 2024 ء کا افتتاحی میچ کافی حد تک پُر امن تھا۔ جبکہ ٹورنامنٹ کی دوران کسی بڑے حملے کے رونما ہونے کے خدشات پائے جاتے تھے۔

یاد رہے کہ جرمنی کی  فٹ بال ٹیم نے اپنے افتتاحی میچ میں شاندار کار کردگی کا مظاہرہ کرتے ہوئے اسکاٹ لینڈ کو ایک کے مقابلے میں پانچ گول سے شکست دی۔ یورو 2024ء کے میچز 14 جولائی تک جرمنی کے شمال میں ہیمبرگ سے لے کر جنوب میں میونخ تک 10 مختلف اسٹیڈیمز میں کھیلے جائیں گے۔ 

ک م/ا ب ا ( اے ایف پی، ڈی پی اے)