یورپین فٹ بال چمپئین شپ کے افتتاحی میچ میں میزبان جرمنی فاتح

یورپین چمپئین شپ فٹ بال کے افتتاحی میچ میں میزبان جرمنی نے اسکاٹ لینڈ کو ایک کے مقابلے میں پانچ گولوں سے شکست دے دی۔ جرمنی شاید ہی یورپی چیمپئن شپ میں اس سے بہتر آغاز کی خواہش کر سکتا تھا۔ میچ کے پہلے ہاف میں فلورین ویرٹس اور جمال موسیالا کے گول جرمنی کے لیے ایک مظبوط بنیاد کی ابتدا بنے۔

 اگرچہ جرمن ٹیم کوجمعے کے روز میونخ شہر کے الیانز ایرینا میں اسکاٹ لینڈ کے خلاف فتح کے لیے زیادہ محنت نہیں کرنا پڑی لیکن یہ میچ میزبانوں کے لیے اپنے ٹورنامنٹ کاایک شاندار  آغاز کرنے اور ملک میں جوش و خروش کو بڑھانے کا مثالی  موقع تھا۔

جرمنی کے کپتان الکے گُن دوآن  نے جرمن براڈکاسٹر زیڈ ڈی ایف کو بتایا، ''ہاں، ہم بالکل اسی طرح سےآغاز کرنا چاہتے تھے  اور سچ پوچھیں تو ہمیں بالکل اسی طرح کی شروعات کی ضرورت تھی۔‘‘ انہوں نے مزید کہا، ''میں کھیل سے پہلے ہی اچھا محسوس کر رہا تھا اور خدا کا شکر ہےکہ ایسا ہی ہوا۔ لیکن  ہمیں ٹورنامنٹ میں آگے تک جانے کے لیے بالکل اسی طرح کے ماحول اور اپنے مداحوں کے جوش و خروش کی ضرورت ہے۔‘‘

اپنے آخری تین بڑے ٹورنامنٹس سے باہر ہونے کے بعد جرمن ٹیم  کی چمپئین شپ ٹائٹل جیتنے کی توقعات بہت کم تھیں۔ لیکن انہوں نے یورو کپ کی تاریخ میں اپنی سب سے بڑی فتح کے ساتھ اس ٹورنا منٹ کا آغاز کیا۔ انہوں نے کھیل کے پہلے ہاف میں غلبہ حاصل کیا، اور  اسکاٹ لینڈ کے لیے اس غلبے کا بدترین اختتام اس وقت ہوا جب جرمن کھلاڑیوں کائی ہیورٹز،  نکلاس فئیول کروگ اور ایمرے جان نے وقفے کے بعد دوسرے ہاف میں تین گول کر کے اسکاٹ لینڈ کو مکمل بدحالی کا شکار کر دیا۔

 جرمنی کے کوچ جولین ناگلسمین نے کہا کہ پہلے 20 منٹ بہت متاثر کن  اور ابتدائی گول بہت اچھے تھے۔ انہوں نے کہا، ''یہ بہت قیمتی ہے کہ بہت سے کھلاڑیوں نے ابتدائی طور پر اچھی کارکردگی کا مظاہرہ کیا۔ یہ صرف پہلا قدم تھا لیکن بہت اچھا تھا اور ہم اس کو آگے بڑھا سکتے ہیں۔ ہم بہت خوش ہیں۔‘‘

اب جرمنی اپنا اگلا میچ انیس جون کو ہنگری کے خلاف کھیلے گا جبکہ اسی روز اسکاٹ لینڈ اور سوئٹزر لینڈ مد مقابل ہوں گے۔

ش ر⁄ ک م (ا ے پی)