ایران اور چین نے اسٹریٹیجک تعاون کا پچیس سالہ معاہدہ کر لیا

ایرانی دارالحکومت تہران سے ستائیس مارچ کو ملنے والی رپورٹوں کے مطابق ایران کے سرکاری ٹیلی وژن نے بتایا کہ ان دونوں ممالک کے مابین اس معاہدے پر دستخط آج ہفتے کے روز کیے گئے۔ اس دوطرفہ معاہدے کو 'جامع اسٹریٹیجک شراکت داری‘ کا نام دیا گیا ہے اور یہ تیل کی صنعت اور کان کنی سے لے کر صنعتی کارکردگی میں اضافے تک کئی طرح کی اقتصادی سرگرمیوں کا احاطہ کرتا ہے۔

’ایرانی حکومت کو گرا دینا چاہیے‘: جان بولٹن

اس کے علاوہ اسی معاہدے کے تحت تہران اور بیجنگ کے مابین ربع صدی تک ٹرانسپورٹ اور زرعی شعبے میں بھی قریبی تعاون کیا جا سکے گا۔ ایرانی ٹیلی وژن کے مطابق اس معاہدے کے طے پا جانے کی تقریب میں ملکی وزیر خارجہ جواد ظریف اور ان کے چینی ہم منصب وانگ یی شامل ہوئے۔

کسی بڑی عالمی طاقت کے ساتھ پہلا طویل المدتی معاہدہ

چین کے ساتھ کیا جانے والا یہ معاہدہ ایران کے لیے کسی بڑی عالمی طاقت کے ساتھ کیا گیا پہلا طویل المدتی سمجھوتہ ہے۔ اس سے قبل 2001ء میں ایران نے روس کے ساتھ بھی زیادہ تر جوہری توانائی کے شعبے میں تعاون کے ایک معاہدے پر دستخط کیے تھے، مگر اس معاہدے کی مدت صرف دس سال تھی۔

ٹرمپ نے جاتے جاتے ایران پر مزید پابندیاں لگا دیں

بعد میں اس معاہدے میں دو مرتبہ پانچ پانچ سال کے لیے توسیع کر دی گئی تھی۔ اس طرح اس روسی ایرانی سمجھوتے کی مجموعی مدت بیس سال ہو گئی تھی۔

چینی وزیر خارجہ کی ایرانی صدر سے ملاقات

اس معاہدے پر دستخطوں کی تقریب سے قبل آج ہفتے کے روز چینی وزیر خارجہ وانگ یی نے ایرانی صدر حسن روحانی اور اس دوطرفہ معاہدے کے نگران ایرانی مندوب اعلیٰ علی لاریجانی سے بھی ملاقاتیں کیں۔

ایشیا کا نیا ممکنہ اتحاد، روس، چین، ایران اور پاکستان

اس حوالے سے ایرانی وزارت خارجہ کے ترجمان سعید خطیب زادہ نے کل جمعے کے روز اس بہت اہم دوطرفہ معاہدے کو 'دور رس، کئی سطحوں پر پھیلا ہوا اور بہت جامع‘ معاہدہ قرار دیا تھا۔

کئی برسوں کے مذاکرات کا نتیجہ

اس معاہدے کے لیے مذاکرات 2016ء سے جاری تھے۔ اس کے تحت بیجنگ اور تہران آپس میں سیاحتی اور ثقافتی تبادلے بھی کر سکیں گے۔ یہ معاہدہ دونوں ممالک کے مابین سفارتی تعلقات کے قیام کی 50 ویں سالگرہ کے موقع پر کیا گیا۔

ایران اور چین کے مابین مضبوط شراکت داری خطے کی صورتحال میں نمایاں تبدیلی کا سبب بن سکتی ہے

کورونا وائرس، ایران بہت بڑی تباہی سے دوچار ہو سکتا ہے

چین اور ایران کے باہمی تعلقات میں کافی زیادہ گرم جوشی پائی جاتی ہے اور 2019ء میں دونوں ممالک نے روس کے ساتھ مل کر شمالی بحر ہند میں کی جانے والی مشترکہ بحری مشقوں میں بھی حصہ لیا تھا۔

سالانہ تجارت بیس بلین ڈالر

بیجنگ اور تہران کے باہمی تعلقات اتنے گہرے ہیں کہ حالیہ برسوں میں دونوں کے مابین تجارت کا سالانہ حجم تقریباﹰ 20 بلین ڈالر تک پہنچ چکا ہے۔ قبل ازیں 2014ء میں اس تجارت کی سالانہ مالیت تقریباﹰ 52 بلین ڈالر رہی تھی مگر پھر ایران کے خلاف امریکی پابندیوں اور عالمی منڈیوں میں تیل کی بہت کم ہو جانے والی قیمتوں کے باعث یہ حجم کم ہو گیا تھا۔

’ایران کے ساتھ فوجی تنازعہ تباہ کن ہو گا‘: عمران خان کا ڈی ڈبلیو کے ساتھ خصوصی انٹرویو

ایران کے لیے اضافی اقتصادی مشکلاات اس وقت دوبارہ شروع ہوئی تھیں جب 2018ء میں اس وقت کے امریکی صدر ڈونلڈ ٹرمپ نے ایران کی عالمی طاقتوں کے ساتھ طے پانے والی جوہری ڈیل سے امریکا کے یک طرفہ اخراج کا اعلان کر دیا تھا۔ تب ڈونلڈ ٹرمپ کا موقف یہ تھا کہ ایران کے ساتھ اس ایٹمی معاہدے پر نئے سرے سے بات چیت ہونا چاہیے۔

خامنہ ای کا امریکا سے پابندیاں ختم کرنے کا مطالبہ

ایران کا ردعمل

امریکا کے ایران کے ساتھ جوہری معاہدے سے اخراج کے بعد سے تہران نے اپنے طور پر بھی اس معاہدے کی بظاہر پاس داری ختم کر دی ہے۔ تہران حکومت اس ڈیل کی کئی شقوں پر عمل نہیں کر رہی، جن میں سے ایک یورینیم کی ایک مقررہ حد سے زیادہ افزودگی نا کرنے سے متعلق ہے۔

ایٹمی ڈیل میں واپسی کے لیے امریکا کے پاس وقت کم ہے: جواد ظریف

تہران کے اس اقدام کا مقصد اس جوہری معاہدے پر دستخط کرنے والے دیگر اہم ممالک پر دباؤ ڈالنا بھی ہے کہ وہ اس معاہدے کو قطعی ناکام ہونے سے بچانے کے لیے پوری طرح سرگرم ہو جائیں۔

ان ممالک میں جرمنی، فرانس، برطانیہ، روس اور چین شامل ہیں۔ اب انہی میں سے ایک ملک چین نے ایران کے ساتھ 25 سال کے لیے قریبی اسٹریٹیجک تعاون کا معاہدہ کر لیا ہے۔

م م / ع ح (اے پی، ڈی پی اے، روئٹرز)