اومابا، شریف کی ملاقات پر پاکستانی ردعمل

پاکستان میں حزب اختلاف کی جماعتوں کا کہنا ہے کہ اس ملاقات سے زیادہ توقعات وابستہ نہیں کی گئی تھیں اور اس کے نتائج سے بھی یہی ظاہر ہوتا ہے۔ اپوزیشن جماعت عوامی نیشنل پارٹی کے سینیٹر زاہد خان کا کہنا ہے کہ ڈرون حملے رکوانے کے معاملے پر نواز شریف کا مؤقف اپنی جگہ لیکن اس معاملے میں صدر اوباما نے ایک لفظ بھی نہیں کہا۔

ڈی ڈبلیو سے بات چیت کرتے ہوئے زاہد خان کا کہنا تھا کہ نواز شریف کو امریکا میں جا کر 'اپنا گھر درست‘ کرنے کا خیال آیا ہے، جو انہیں درست کر کے ہی امریکا جانا چاہیے تھا۔ انہوں نے کہا، ’’ہم یہ توقع رکھیں کہ جو بھی ہم کہیں گے، وہ (امریکا) مان لے گا، یہ میرے خیال میں ہماری غیر سنجیدہ سوچ ہی ہو سکتی ہے۔ ظاہر ہے کہ امریکا جس طریقے سے ہمیں ڈیل کرتا ہے، اور آج سے نہیں بلکہ ساٹھ سال سے زائد عرصے سے یہ سلسلہ چلا آرہا ہے، میرے خیال میں اس میں کو ئی انہونی بات نہیں اور ہمیں کو ئی توقع بھی نہیں تھی کیونکہ ہم نے ان کے مفادات کا تحفظ کیا ہے، انہوں نے ہمارے مفادات کا تحفظ کبھی نہیں کیا۔‘‘

حزب اختلاف کی جماعتوں پییپلز پارٹی اور تحریک انصاف کو بھی اس ملاقات میں کوئی قابل ذکر کامیابی نظر نہیں آئی۔ تاہم بعض تجزیہ کاروں کے خیال میں ایبٹ آباد میں اسامہ بن لادن کی ہلاکت کے بعد پاک امریکا تعلقات کی کشیدہ نوعیت کے تناظر میں یہ ملاقات بہت اہم تھی۔

اسلام آباد میں قائم ایک تھنک ٹینک ساؤتھ ایشین سٹریٹیجک سٹیبیلیٹی انسٹیٹیوٹ (ساسی) کی ڈائریکٹر جنرل ماریہ سلطان کے مطابق یہ بات قابل ‌ذکر ہے کہ دونوں رہنماؤں نے انسداد دہشت گردی، معیشت، خزانے، توانائی، سکیورٹی اور ہتھیاروں کے عدم پھیلاؤ کے شعبوں میں پانچ ورکنگ گروپ بنانے پر اتفاق کیا ہے۔

ڈی ڈبلیو سے بات چیت کرے ہوئے ماریہ سلطان نے کہا: ’’دونوں ممالک نے اپنی طرف سے جو کچھ ممکن تھا، اس کے اندر رہتے ہوئے ایک دوسرے کے ساتھ تعاون کیا ہے۔ جیسے کہ پاکستان نے دو مئی کے بعد جو کولیشن سپورٹ فنڈ کے 1.62 ارب ڈالر کے خرچے کی رسید امریکا کو نہیں دی تھی، جس کا مطلب تھا کہ پاکستان امریکا کے ساتھ دہشت گردی کے خلاف کسی قسم کا تعاون نہیں چاہتا۔ اب پاکستان نے وہ رقم مانگی ہے، تو امریکہ نے جاری کر دی ہے۔‘‘

وزیر اعظم نواز شریف نے امریکا رونگی سے قبل اور پھر صدر اوباما کے ساتھ ملاقات کے بعد بھی پاکستانی قبائلی علاقوں میں بغیر پائلٹ کے پرواز کرنے والے امریکی ڈرون طیاروں کے حملوں کو رکوانے کے معاملے پر بات کی تھی۔ دفاعی تجزیہ کا ر ائیر مارشل (ر) مسعود اختر کا کہنا ہے کہ امریکی خبار واشنگٹن پوسٹ کی اس رپورٹ کے بعد موجودہ پاکستانی حکومت کے لیے اپنی پوزیشن واضح کرنا اور بھی ضروری ہو گیا ہے، جس کے مطابق پاکستانی حکام ڈرون حملوں کی توثیق کرتے رہے ہیں بلکہ اس بارے میں انہیں امریکی حکام بریفنگ بھی دیتے رہے ہیں۔

مسعود اختر کا کہنا ہے، ’’دونوں ملکوں نے مفاہمت پیدا کرنے کی کوشش کی ہے لیکن یہ ایک نہایت پیچیدہ مسئلہ ہے۔ جب تک ہمارے ہاں ایسے علاقے موجود ہیں، جہاں سے خطے میں اور بالخصوص افغانستان میں امریکا کے مفادات پر حملے ہوتے رہیں گے، تو ڈرون حملے بھی جاری رہیں گے کیونکہ یہ امریکا کے اہم ترین قومی مفاد میں ہے۔‘‘

ادھر حکمران جماعت مسلم لیگ (ن) اپنے رہنما اور وزیر اعظم نواز شریف کے اس دورے کو انتہائی کامیاب اور دور رس نتائج کا حامل قرار دے رہی ہے۔