افغان خواتین کی حالت قدرے بہتر

آج منگل کے روز جاری کی گئی اس رپورٹ میں کہا گیا ہے کہ افغان خواتین نے زندگی کے بہت سے شعبوں میں ترقی کی ہے اور یہ کہ وہ قوانین کا بہتر استعمال کرتے ہوئے اپنے حقوق کے تحفظ میں پہلے سے زیادہ کامیاب نظر آتی ہیں۔

یہ رپورٹ ایک ایسے وقت سامنے آئی ہے جب افغانستان میں خواتین کے حقوق کے حوالے سے کام کرنے والی ایک سینئر اہلکار کو گولی مار کر ہلاک کر دیا گیا اور ایک دوسرے واقعے میں ایک پندرہ سالہ لڑکی نے اپنے شوہر اور اس کے باپ کے ہاتھوں متواتر تشدد کا نشانہ بننے سے دل برداشتہ ہو کر خود سوزی کر لی۔

اقوام متحدہ کی افغانستان کے انسانی حقوق سے متعلق رپورٹ میں خواتین پر تشدد کے واقعات کا تفصیلی ذکر کیا گیا ہے۔ رپورٹ میں یہ بھی کہا گیا ہے کہ گو کہ افغانستان میں خواتین پر تشدد کے واقعات رونما ہو رہے ہیں تاہم ایک مثبت پیش رفت یہ ہے کہ خواتین اب ان واقعات کے خلاف پولیس سے زیادہ رجوع کرتی ہیں۔ خیال رہے کہ افغانستان میں مذہبی ا ور ثقافتی وجوہات کی بنا پر خواتین پر تشدد کے واقعات زیادہ تر رپورٹ نہیں کیے جاتے۔ بہت سے موقعوں پر خواتین کو فکر ہوتی ہے کہ رپورٹ کرنے پر انہیں جان سے ہاتھ نہ دھونے پڑیں۔

یہ رپورٹ سن دو ہزار ایک میں افغانستان میں طالبان پر امریکی حملے اور ان کے سفاک دور اقتدار کے خاتمے کے بعد کے گیارہ سالوں میں خواتین کی حالت کا احاطہ کرتی ہے۔ طالبان کی حکومت نے خواتین کی تعلیم اور ان کے دفاتر میں کام کرنے پر پابندی کر کھی تھی۔

سن دو ہزار ایک سے لے کر اب تک بین الاقوامی برادری افغانستان میں انسانی حقوق، بالخصوص خواتین کے حقوق کی بہتری کے لیے کروڑوں ڈالر خرچ کر چکی ہے۔ گو کہ افغانستان میں خواتین کے حقوق کی صورت حال قابل رشک نہیں، تاہم اس میں خاصی بہتری دیکھی جا رہی ہے۔ کم عمر لڑکیاں اب اسکول جا سکتی ہیں اور افغان پارلیمنٹ میں خواتین کو نمائندگی حاصل ہے۔ تاہم رپورٹ میں کہا گیا ہے کہ اب بھی خواتین کو مردوں سے کم تر سمجھا جاتا ہے۔

مغربی ممالک نے وعدہ کیا ہے کہ سن دو ہزار چودہ میں افغانستان سے افواج کے انخلاء کے باوجود وہ افغانستان میں جمہوریت اور انسانی حقوق کے فروغ کے لیے امداد کرتے رہیں گے۔

(shs / ij (AFP