چین: گُو کائیلائی کو معطل سزائے موت

معطل سزائے موت کا مطلب ہے کہ اگر گُو دوران قید دو برس تک اچھے رویے کا مظاہرہ کرتی ہیں تو ممکنہ طور پر یہ سزا عمر قید میں تبدیل کر دی جائے گی۔ گُو نے استغاثہ کی طرف سے عائد کردہ الزامات کو عدالت میں چیلنج نہیں کیا۔

خبر رساں ادارے روئٹرز نے پیر کو بند کمرے میں ہونے والی عدالتی کارروائی کے دوران وہاں موجود افراد کے حوالے سے اس سزا کی تصدیق کی ہے۔ چین میں معطل سزائے موت زیادہ تر کیسوں میں عمر قید میں تبدیل کر دی جاتی ہے۔ عدالتی فیصلے کے بارے میں تفصیلات ایک پریس کانفرنس میں بتائی جائیں گی۔ روئٹرز نے عدالتی ذرائع کے حوالے سے بتایا ہے کہ اس حوالے سے نیوز بریفنگ جلد ہی منعقد کی جائے گی۔

بیجنگ میں برطانیہ کے سفارتخانے کی طرف سے جاری کیے گئے ایک بیان میں اس عدالتی فیصلے کی تعریف کی گئی ہے۔ کہا گیا ہے کہ چینی حکام نے نیل ہیووڈ کے قتل کی تحقیقات کیں اور ان افراد کو انصاف کے کٹہرے میں لائے، جو اس جرم کے ذمہ دار تھے۔ اس مقدمے کی سماعت کے دوران غیر ملکی صحافیوں کو کمرہ عدالت میں جانے کی اجازت نہ تھی تاہم لندن حکومت کے دو سفارتکاروں کو کمرہ عدالت میں جانے کی خصوصی اجازت دی گئی تھی۔ مقتول برطانوی شہری ہیووڈ 1990ء سے چین میں سکونت پذیر تھا۔

سرکاری میڈیا پر جاری کی گئی دفتری دستاویزات کے مطابق گُو کائیلائی نے نو اگست کو ہونے والی عدالتی کارروائی میں اعتراف جرم کیا تھا کہ اس نے گزشتہ برس نومبر میں نیل ہیووڈ کو زہر دے کر ہلاک کر دیا تھا۔ گُو کے بقول بزنس میں ایک تنازعہ کی وجہ سے نیل ہیووڈ نے اس کے بیٹے بُو گوا گوا کو دھمکی دی تھی۔

ہیووڈ کے گھرانے کے وکیل ہی زہنگ سہنگ نے کہا ہے کہ وہ عدالتی فیصلے کا احترام کرتے ہیں۔ یہ مقدمہ چین کے مشرقی شہر ہیفائی میں چلایا گیا تھا۔ ہیووڈ کے وکیل کے مطابق گُو کے ساتھی جنگ شیاؤیُن کو نو برس کی قید سنائی گئی ہے۔ شیاؤیُن پر اس قتل کی وارات میں گُو کی معاونت کا جرم ثابت ہوا۔

گُو کائیلائی کے شوہر بو ژیلائی کو پہلے سے ہی پارٹی ڈسپلن کی خلاف ورزی، بدعنوانی اور طاقت کے ناجائز استعمال جیسے الزامات کا سامنا ہے اور اس حوالے سے تحقیقات ابھی جاری ہیں۔ تاہم اب ان کی اہلیہ کو ہیووڈ کے قتل کا مجرم قرار دیے جانے کے بعد یہ بھی ممکن ہے کہ اس قتل کی وارات میں مشتبہ طور پر معاونت کرنے کے الزام پر ان پر بھی فرد جرم عائد کر دی جائے۔

بُو ژیلائی کیمونسٹ پارٹی کے اعلیٰ عہدے پر فائز تھے۔ خیال کیا جا رہا تھا کہ وہ رواں برس کے اختتام پر اپنی پارٹی میں قومی سطح کی قیادت میں اہم مقام حاصل کرنے میں کامیاب ہو جائیں گے۔ تاہم اپریل میں اپنی اہلیہ کے خلاف شروع ہونے والے اس کیس کے بعد وہ منظر عام پر نہیں آئے۔

aa/aba (Reuters)