بھارت میں ہدہد طوفان: ہلاکتوں کی تعداد 30 ہو گئی

تباہی کا شکار ہونے والے شہروں کی تعمیر نو میں برسوں لگنے کا خدشہ ظاہر کیا جا رہا ہے۔ اس دوران وزیر اعظم نریندر مودی نے آندھرا پردیش کے سب سے زیادہ تباہ حال ساحلی شہر وشاکھا پٹنم کا دورہ کیا اور دیگرمتاثرہ علاقوں کا فضائی معائنہ بھی کیا۔ نریندر مودی نے تباہ حال ریاست کو ایک ہزار کروڑ روپے کی مالی امداد کا اعلان بھی کیا۔
آج سہ پہر وشاکھا پٹنم پہنچنے کے بعد وزیر اعظم نے تباہ حال ہوائی اڈے اور شہرکے دیگر علاقوں کا معائنہ کیا۔ انہوں نے آندھرا پردیش کے وزیر اعلیٰ چندرا بابو این چندرا بابو نائیڈو اور ریاست کے اعلیٰ افسران کے ساتھ صورت حال پرتبادلہ خیال کیا۔ وزیر اعظم نے بعد میں آندھرا پردیش اورپڑوسی ریاست اوڑیسہ کے ہدہد طوفان سے متاثرہ علاقوں کا فضائی معائنہ بھی کیا۔

وزیراعلیٰ نائیڈو نے وزیر اعظم کو بتایا کہ طوفان سے بھارتی بحریہ کو دو ہزار کروڑ روپے کا نقصان ہوا ہے۔ خیال رہے کہ یہاں ایسٹرن نیول کمانڈ کا ہیڈ کوارٹر واقع ہے اوراس کی تنصیبات کو زبردست نقصان پہنچا ہے۔ اسی طرح وشاکھا پٹنم اسٹیل پلانٹ کو بھی تقریبا 340 کروڑ روپے کے نقصان کا اندازہ ہے۔ کارخانے میں پروڈکشن بند ہو جانے کی وجہ سے اسے یومیہ چالیس کروڑ روپے کا نقصان ہو رہا ہے اور پروڈکشن شروع ہونے میں ابھی مزید چار پانچ روز لگ سکتے ہیں۔

وزیر اعظم مودی نے وشاکھا پٹنم ہوائی اڈے کا جائزہ لیا۔ تقریباََ200 کلومیٹر کی رفتار سے چلنے والی تیز ہواوں نے ہوائی اڈے کی چھت کو اڑا دیا ہے۔ یہاں سے پروازیں ایک ہفتے بعد ہی شروع ہو پائیں گی۔ ہوائی اڈے کو پہنچنے والے نقصان کا تخمینہ تقریباََ 500 کروڑ روپے ہے۔ اس کا کمیونیکیشن نیٹ ورک بھی تباہ ہوگیا ہے۔ وزیر اعلیٰ نے وزیر اعظم نریندر مودی سے اس آفت کو قومی آفت قرار دینے اور فوری طور پر دو ہزار کروڑ روپے کی مالی امداد دینے کا مطالبہ کیا۔

قبل ازیں دہلی میں کابینہ سیکرٹری اجیت سیٹھ نے نامہ نگاروں کو بتایا کہ'' وزیر اعظم نریندر مودی گذشتہ دو تین دنوں سے اس طوفان کے متعلق معلومات لے رہے تھے اور اس بات پر زور دے رہے تھے کہ مرکزی اور ریاستی حکومتوں کے درمیان مکمل رابطہ رہے اور ریاستی اورمرکزی ایجنسیاں جو امدادی کام کر رہی ہیں ان میں بھی مکمل رابطہ ہو۔ وزیر اعظم نے صورت حال پر تفصیلی میٹنگ بھی کی اور اس بات پر زور دیا کہ آندھرا پردیش اور اوڑیسہ کو ہر ممکن مدد دی جائے۔‘‘

طوفان کے گذر جانے کے بعد امدادی سرگرمیاں تیز ہوگئی ہیں۔ فوج اور نیشنل ڈیزاسٹر ریلیف فورس(این ڈی آر ایف) نے امداد اوربحالی کا کام شروع کر دیا ہے۔ این ڈی آر ایف کے ڈائریکٹر جنرل او پی سنگھ نے بتایا، '' اب تک 42 ٹیموں کو آندھرا پردیش اور اوڑیسہ بھیجا جا چکا ہے۔ ان میں سے دس ٹیمیں صرف وشاکھا پٹنم بھیجی گئی ہیں، جبکہ مزید تین ٹیمیں وہاں بھیجی جا رہی ہیں جہاں سمندری طوفان کا سب سے زیادہ اثر ہوا ہے۔‘‘

اس دوران طوفان سے متاثرہ علاقوں میں لازمی اشیاء مثلاََ پینے کا پانی، دودھ وغیرہ کی زبردست قلت کی خبریں موصول ہو رہی ہیں۔ دکاندار ایک لیٹر پانی کی بوتل کے لیے سو روپے تک وصول کر رہے ہیں جو عموماََ دس روپے میں ملتی ہے۔ بعض مقامات پر دکانوں کے لوٹ لیے جانے کی بھی خبریں ہیں۔ بہر حال ماہرین کا کہنا ہے پچھلے سال آنے والے فائلن طوفان سے حکومت نے جو سبق حاصل کیا تھا اس سے فائدہ اٹھانے کے باعث اس مرتبہ بہت کم جانی نقصان ہوا ہے۔ وزیر اعظم نے کہا کہ ٹیکنالوجی نے بحران کا مقابلہ کرنے میں کافی مدد کی اور مرکز اور ریاستی حکومت کے قریبی رابطوں سے جانی نقصان کم کرنے میں مدد ملی ہے۔