Wanamgambo wawaua watu 18 nchini Mali

Haya ni kulingana na vyanzo kadhaa vilivyozungumza na shirika la habari la Ufaransa AFP. Raia watatu wa kijiji hicho cha Diallassagou wamesema kuwa idadi ya waliojeruhiwa ni watu 21.

Afisa mmoja ameliambia shirika hilo la AFP kuwa wahanga hao wa mashambulizi hayo wote walikuwa wamekimbia mapigano na walikuwa wamekita kambi katika kijiji hicho.

Mnamo Juni mwaka 2022, zaidi ya raia 130 waliuwawa katika kijiji kimoja, katika mojawapo ya mashambulizi mabaya zaidi kuwahi kushuhudiwa nchini Mali katika miaka ya hivi karibuni.

Serikali ya Mali ilikinyoshea kidole cha lawama kundi la Katiba Macina lililo na mafungamano la Al-Qaeda kwa shambulizi hilo.