Uwanja wa ndege wa Hamburg wafungwa kwa sababu za kiusalama

Uwanja wa Hamburg ulioko Kaskazini mwa Ujerumani umefungwa kwa wasafiri na hata safari za ndege kufutwa tangu Jumamosi usiku wakati mwanamume mmoja aliyejihami, alipouvamia uwanja huo kwa gari lake na kuvunja lango la kuingilia kabla ya kuanza kufyatua risasi hewani.

Polisi imesema mke wa mwanamume huyo awali aliripoti kuhusu utekaji nyara wa mtoto wao wa kike.

Mwanamume huyo aliye na miaka 35 anasemekana kumpokonya mkewe gari na kumchukua mtoto huyo wa miaka 4 na kuelekea moja kwa moja katika uwanja wa ndege alikosababisha tukio hilo.

Kwa sasa bado polisi na wanasaikolojia wanaendelea kuzungumza nae, lakini hakuna hata mtu mmoja aliyejeruhiwa katika mkasa huo.