Uganda yamkamata mshukiwa wa mkanyagano wa mwaka mpya

Polisi ya Uganda leo imesema imemkamata mshukiwa mkuu aliyetoroka baada ya mkanyagano uliosababisha vifo katika hafla moja ya mkesha wa Mwaka Mpya. Msemaji wa polisi ya Kampala Patrick Onyango ameliambia shirika la habari la Ufaransa AFP kwamba, Elvis Francis Juuko alikamatwa Ijumaa iliyopita alikokuwa amejificha huko Mityana, karibu kilomita 60 magharibi mwa Kampala. Onyango lakini hakusema ni lini mshukiwa huyo atafikishwa mahakamani. Polisi inamtuhumu Juuko kwa kuwashawishi watu waliokuwa katika hafla hiyo kupitia njia nyembamba kutazama fataki, jambo lililochochea mkanyagano huo. Watu kumi wengi wao wakiwa watoto waliuwawa katika mkanyagano huo.