Idadi ya waliokufa kwa tetemeko la ardhi Ufilipino yafikia 7

Juhudi za uokoaji pia zinaendelea kuwatafuta watu wawili wanaohofiwa kufukiwa kufuatia maporomoko ya ardhi. Tetemeko hilo lenye ukubwa wa 6.7 lililolikumba eneo la Mindanao mchana wa jana Ijumaa, lilisababisha sehemu ya paa la duka moja kubwa kuporomoka, likisababisha kukatika kwa umeme na watu kukimbilia mitaani. Kulingana na polisi, vifusi vya duka hilo katika mji wa General Santos vilipelekea kifo cha mwanamke mmoja. Waokoaji wanasema tetemeko hilo lilisababisha uharibifu wa nyumba 60 katika mikoa minne pamoja na barabara na madaraja 32 katika eneo hilo.