Ronaldo "hauzwi"

Erik ten Hag akizungumza kabla ya mechi ya kirafiki ya kabla ya kuanza msimu dhidi ya Liverpool huko Bangkok, amesema "Tuna mipango na Christiano Ronaldo kwa msimu ujao na huo ndio msimamo na ninatarajia kufanya kazi naye". "Nimesoma. Lakini kile ninachoweza kusema ni kwamba Cristiano hauzwi. Yuko kwenye mipango yetu na tunataka kufanikiwa tukiwa pamoja", aliongeza Ten Hag.

Kulingana na meneja huyo raia wa Uholanzi, tayari alishazungumza na mshambuliaji huyo kabla ya kusambaa kwa ripoti wiki iliyopita kwamba anataka kuondoka na kusema kwamba walikuwa na mazungumzo mazuri tu.

Ronaldo pia hakuhudhuria mazoezi ya awali na klabu hiyo ya Premier wiki iliyopita kwa madai ya matatizo ya kifamilia, huku ripoti zikisema Ronaldo mwenye umri wa miaka 37 anataka kuondoka United baada ya kikosi hicho kushindwa kufuzu kwenye michuano ya Mabingwa Ulaya, lakini pia matokeo mabovu tangu aliporejea mwaka jana.

United ilimaliza ikiwa nafasi ya sita kwenye msimu uliopita. Ronaldo alifunga magoli 24.

Mashirika: AFPE