Nahodha wa zamani wa Arsenal Xhaka atua Bayer Leverkusen.

Baada ya kuwatumikia washika bunduki wa London kwa miaka saba, hatimaye kiungo Granit Xhaka amefikia tamati na kutimkia Ligi kuu ya soka Ujerumani Bundesliga.

 

Soma zaidi: Bayern na Leverkusen, nani atalitwaa taji la DFB Pokal Jumamosi?

Kupitia taarifa rasmi ya klabu, Kocha wa Arsenal Mikel Arteta amemuelezea mchezaji huyo aliyewahi kuwa nahodha wa timu hiyo mwaka 2019 kwamba ''imekuwa ni safari ya aina yake na Xhaka kwake na kwetu kama klabu na kiukweli ameipambania kwa nguvu klabu yetu na anaondoka kwa heshima kubwa na tunamtakia kila la kheri katika safari yake.''

Kiungo huyo raia wa Switzerland alijiunga na Arsenal akitokea Borussia Mönchengladbach mwaka 2016 na tayari klabu ya soka ya Bayer 04 Leverkusen imemtangaza Xhaka kama mchezaji wake mpya kuelekea msimu mpya wa mwaka 2023-24.

 

Soma zaidi: Guerreiro atangaza kuondoka Borussia Dortmund

Arsenal inaripotiwa kukamilisha uhamisho wa kiungo wa kati wa Uingereza Declan Rice kwa mkataba wa kuvunja rekodi katika ligi kuu ya Uingereza kutoka West Ham.

Xhaka alifunga mabao 23 katika mechi 297 alizochezea The Gunners, na kuwasaidia kushinda Kombe la FA mara mbili na kumaliza katika nafasi ya pili ndani ya ligi kuu ya Premia msimu uliopita.

Katika mechi yake ya mwisho ya ligi kuu nchini akiwa na Arsenal alifunga mabao mawili katika ushindi wa 5-0 nyumbani dhidi ya Wolverhampton Wanderers.

Xhaka hapo awali alicheza kwa miaka minne katika Bundesligaakiwa Borussia Monchengladbach.

Baada ya hapo aliondoka na kujiunga na The Gunners kwa dau la pauni milioni 35 mwaka 2016 na sasa anarejea tena Ujerumani zamu hii akiwa na Bayer 04 Leverkusen.