Mfumo wa TEHAMA watetereka na kuzusha kizaazaa duniani

Mabenki, maduka makubwa na taasisi nyingine kote duniani, zimeripoti kukatika kwa huduma zinazohusisha intaneti, huku baadhi ya mashirika ya ndege yakitoa tahadhari ya kucheleweshwa au kusitishwa safari za ndege.

Tatizo hilo limeathiri safari za ndege nchini Marekani, limetatiza matangazo ya televisheni nchini Uingereza na limeathiri mawasiliano ya simu nchini Australia. Uwanja wa ndege wa Brandenburg nchini Ujerumani, pia umetangaza kusitisha baadhi ya safari za ndege.

Kampuni kubwa ya teknolojia ya Microsoft imesema usiku wa kuamkia leo kuwa inachunguza tatizo hilo, ambalo limeathiri huduma na programu zake na kuongeza kwamba watumiaji wake watashindwa kuzifikia huduma nyingi zinazotegemewa na mamilioni ya watu duniani kote.