Mfalme Charles azuru Ujerumani

Mfalme Charles anafanya ziara hiyo baada ya kuahirisha ziara yake nchini Ufaransa kutokana na maandamano ya kupinga mabadiliko ya pensheni nchini humo. Katika ziara hiyo ya siku tatu, Mfalme huyo wa Uingereza ataanzia mjini Berlin atakakofanya shughuli kadhaa kabla ya kuelekea mjini Hamburg. Rais wa shirikisho la Ujerumani Frank Walter Steinmeier amesema ziara hiyo inaonesha urafiki wa karibu kati ya nchi hizo mbili. Mfalme Charles na mkewe Camilla watapokelewa na rais Steinmeier pamoja na mkewe Elke Bueden-bender katika gwaride la heshima la kijeshi. Akiwa katika ziara hiyo miongoni mwa mambo anayotarajiwa kugusia ni pamoja na mzozo unaoendelea wa Ukraine.