Mashambulizi ya anga yautikisa mji mkuu wa Sudan Khartoum

Mashambulizi hayo yamejiri wakati mazungumzo ya kutafuta amani yanayofanyika katika mji wa Jeddah nchini Saudi Arabia yakishindwa kuzaa matunda.

Mwanadiplomasia wa Saudi Arabia amesema kuwa majadiliano hayo yameshindwa kupiga hatua, kwa sababu kila upande katika mzozo wa Sudan unaamini unaweza kushinda.

Akizungumza na shirika la habari la AFP kwa masharti ya kutotajwa jina, mwanadiplomasia wa Saudi Arabia amesema kuwa usitishaji mapigano wa kudumu sio mojawapo ya ajenda zinazojadiliwa.

Uhasama wa kutumia zana kali za kivita uliozuka Aprili 15 umewafanya wageni na wenyeji kuihama Sudan, kwa kutumia njia za anga na nchi kavu, kuelekea Misri, Chad, Sudan Kusini na nchi nyingine jirani.