Marseille kupambana na Lazio, Frankfurt ligi ya Ulaya

Arsenal wamwekwa  katika  kundi  rahisi dhidi  ya  Sporting Lisbon, Qarabag  ya  Azerbaijan na Vorskla  ya  Ukraine. Klabu  nyingine  ya England   katika  kinyang'anyiro  hicho  cha  Ulaya, Chelsea, itacheza  na  PAOK Saloniki, BATE Borisov kutoka  Belarus  na Vidi ya  Hungary.

Mabingwa  wa  Scottland  Celtic  iko  katika  kundi  ambalo linajumuisha  klabu  mbili  zinazodhaminiwa  na  kampuni  ya  Red Bull, Salzburg, iliyoondolewa  katika awamu ya  nusu  fainali  msimu uliopita, RB Leipzig, pamoja  na  Rosenbourg ya  Norway.

Rangers, inakumbana  na  kizingiti  kigumu kusonga  mbele  wakati ikirejea  katika  mapambano  ya  Ulaya  dhidi  ya  Villarreal  ya Uhispania, Rapid Vienna  na  Spartak Moscow.

Dudelange, klabu  ya  kwanza  kutoka  Luxembourg  kufika awamu ya  makundi  katika  kinyang'anyiro  hicho, wamepewa  safari ya kwenda  San Siro kucheza  na  AC Milan, ambao  wameshinda mataji  manane  ya  Ulaya, na  pia  watakumbana  na  Real Betis na Olympiakos.

Antoine Griezmann , ambaye  alifunga  mabao  mawili  katika  fainali ya  msimu  uliopita  wakati  Atletico Madrid  ilipoishinda  Marseille kwa  mabao 3-0, alitajwa  kuwa  mchezaji  bora  wa  ligi  ya Ulaya msimu  uliopita.

Griezmann mshindi  wa  taji  la  dunia  akiwa  na  Ufaransa, pia alimaliza  akiwa  wa  nne  katika  tuzo  ya  mchezaji  bora  wa  EUFA msimu  uliopita tuzo  zilizotangazwa  jana  Alhamis  na  mchezaji kutoka  Croatia Luka Modric ndie  aliyeshinda  tuzo  hiyo, mshindi wa  fainali  ya  kombe  la  mabingwa  wa  Ulaya  na  makamu  bingwa wa  kombe  la  dunia. Duru  ya  kwanza  ya  michezo  hiyo itafanyika Alhamis , Septemba 20.

Mwandishi: Sekione  Kitojo / afpe

Mhariri: Iddi Sssessanga