Biden alaani shambulizi la shule huko Nashville

Watu sita waliuawa katika shambulio hilo la Jumatatu wiki hii, wakiwamo wanafunzi watatu na wafanyakazi watatu. Biden alikemea alichokiita 'uhalifu wa kuchukiza wa kutumia bunduki dhidi ya watoto', na kuongeza kuwa kama taifa, Wamarekani wanapaswa kusimamisha kadhia hii. Alisema ''Unajua, tunalazimika kuwajibika zaidi, kuwalinda watoto wetu ili wajifunze kusoma na kuandika badala ya kukwepa risasi madarasani. Tunalazimika kuchukua hatua.''

Akizungumza jimboni North Carolina, Biden alisema mashambulizi ya kutumia silaha za moto yanauwa Wamarekani wengi wenye umri kuanzia mwaka mmoja hadi miaka 19, kuliko wanaokufa katika ajali za barabarani. Rais huyo alisema sehemu kubwa ya Wamarekani wanaamini kuwa umiliki wa silaha za kivita ni kitu kisichoeleweka, na kulitolea wito bunge la Marekani kupiga marufuku ununuzi wa silaha za aina hiyo.