د شمالي کوریا مشر روسیې ته ورسید

شنونکي په دې باور دي چې د روسیې ولسمشر ولادیمیر پوتین به له شمالي کوریا څخه د اوکراین د جګړې لپاره د توپچي مهماتو او د ټانک ضد توغندیو غوښتنه وکړي. په پام کې ده چې دواړه مشران په ولادیوستوک کې سره وګوري.

د جنوبي کوریا پوځ او د روسیې دولتي رسنیو ویلي، د شمالي کوریا مشر کیم جونګ اون د سه شنبې په ورځ روسیې ته رسېدلی او تمه ده چې د روسیې له ولسمشر ولادیمیر پوتین سره وګوري.

سیول وویل: »د ملي دفاع وزارت باور لري چې کیم جونګ اون نن سهار په یوه شخصي اورګاډي کې روسیې ته ننوتلی دی.«

د شمالي کوریاد دولتي خبري آژانس په وینا، کیم د یکشنبې په ورځ پهپیونګ یانګ کې په خپل زغره وال اورګاډي کې سپاره شو.

د راپورونو له مخې، په دغه سفر کې له کیم سره د واکمن ګوند یو شمېر غړي، چې هویت یې نه دی څرګند شوی او یوشمیر پوځيان هم شامل دي. رویټرز خبري آژانس راپور ورکړی چې هغه خپل ریل ګاډی د خاسان په سیمه کې د روسیې په سرحدي سټیشن کې له ځایي چارواکو سره د لیدو لپاره پریښود.

د روسیې ریانوستی خبري آژانس وروسته له هغه عکسونه خپاره کړل چې د کیم جونګ اون ریل ګاډي ته په سیمه کې د یوه د روسیې لوکوموتیف لخوا بدرګه کیږي.

د دې غونډې په اجنډا کې څه دي؟

دا د کوویډ۱۹ وبا وروسته د کیم جونګ اون لومړنی بهرنی سفر دی، هغه مخکې د کرونا له کبله دې ته اړ شوې وو چې د خپل هیواد پر پولو محدودیت زیات کړي.

د دې غونډې یو احتمالي ځای ممکن د روسیې په ختیځ کې د ولادیوستوک ښار وي. پوتین د دوشنبې په ورځ ولادیوستوک ته ورسید چې په ختیځ اقتصادي فورم کې ګډون وکړي او دا غونډه به تر چهارشنبې پورې دوام کوي.

شنونکي، او همدارنګه امریکایي چارواکي په دې باور دي چې دا غونډه د پوتین لپاره یو فرصت کیدی شي چې له شمالي کوریا څخه د توپونو مرمۍ او د ټانک ضد توغندیو غوښتنه وکړي ترڅو د اوکراین پر وړاندې ېې په جګړه کې وکاروي.

د امریکا د بهرنیو چارو د وزارت ویاند متیو میلر، خبریالانو ته وویل، له هغه وخته چې ولادیمیر پوتین په نړیواله کچه د منزوي شوې مشر سره د لیدو لپاره پر اوږده لار راوتلې نو هغه به هرو مرو د مرستې غوښتنه وکړي.

برعکس، کیم جونګ اون د سپوږمکۍ سیسټم او اټومي اوبتلونو لپاره د پرمختللي ټیکنالوژۍ په لټه کې دی، او همدارنګه د خپل بې وزله هیواد لپاره د خوراکي توکو د مرستې.

د کرملین ویاند دیمیتري پیسکوف وویل چې پوتین او کیم ممکن د اړتیا په صورت کې یواځې سره وویني.

هغه وويل: »لکه څنګه چې تاسو پوهیږئ، د شمالي کوریا په ګډون زموږ له ګاونډیانو سره په اړیکو کې موږ ته د دواړو هیوادونو ګټې مهمې دي، نه د واشنګټن خبرداری.« هغه زیاته کړه: »هغه څه چې موږ پرې تمرکز کوو د دواړو هیوادونو ګټې دي.«