یورپ میں کوکین کی اسمگلنگ کا مرکزی دروازہ بیلجیم کا ایک شہر

بیلجیم کے دارالحکومت برسلز سے موصولہ رپورٹوں کے مطابق ریاستی دفتر استغاثہ کی ایک خاتون ترجمان نے ہفتہ 29 اگست کے روز بتایا کہ اینٹ ویرپ (Antwerp) کے بندرگاہی شہر میں قانون نافذ کرنے والے اداروں کے اہلکاروں نے گزشتہ آٹھ روز کے دوران 2.3 ٹن کوکین اپنے قبضے میں لے لی۔

ایک واقعے میں تو گزشتہ پیر کے روز تقریباً ایک ٹن کوکین ضبط کر لی گئی اور ساتھ ہی چار مشتبہ اسمگلروں کو گرفتار بھی کر لیا گیا۔ اس سے قبل 20 اگست کے روز بھی اینٹ ویرپ کی بندرگاہ کے قریب ہی ایک چھاپے کے دوران 510 کلو گرام کوکین پکڑی گئی تھی اور تین مشتبہ اسمگلر حراست میں لے لیے گئے تھے۔

اس واقعے کے صرف ایک روز بعد ہی اکیس اگست کو مزید 675 کلو گرام کوکین پکڑی گئی تھی۔ حکام کو اتنی بڑی مقدار میں اس بہت مہنگے نشہ آور مادے کا پتا حادثاتی طور پر اس وقت چلا تھا جب شہر کی بندرگاہ کا ایک ملازم چھپ کر لیکن بہت مشکوک انداز میں ایک کارگو کنٹینر کے اوپر چڑھنے کی کوشش کر رہا تھا۔ اس پر حکام نے جب اس کنٹینر کی تلاشی لی، تو اس میں سے پونے سات سو کلوگرام کوکین برآمد ہوئی تھی۔

اینٹ ویرپ کی بندرگاہ کے حکام کے مطابق یہ شہر یورپ میں سمندری راستے سے مال برداری کے لیے بہت اہم راستہ ہے اور اسی لیے لاطینی امریکی ممالک میں منشیات کا کاروبار کرنے والے جرائم پیشہ گروہ اس راستے سے منشیات یورپ اسمگل کرنے کی کوشش کرتے ہیں۔

بیلجیم کے اس شہر کے راستے یورپ میں کوکین اسمگل کرنے کی کوشش کرنے والے اسمگلروں کا تعلق زیادہ تر لاطینی امریکی ممالک برازیل، کولمبیا اور ایکواڈور سے ہوتا ہے۔

منشیات کے یہ بین الاقوامی اسمگلر اپنے مجرمانہ کاروبار کے لیے ایک راستے کے طور پر بیلجیم کے اس شہر پر اس قدر انحصار کرتے ہیں کہ گزشتہ برس حکام نے وہاں سے لاطینی امریکا سے کارگو کنٹینروں میں چھپا کر اسمگل کی گئی تقریبا ﹰ62 ٹن کوکین اپنے قبضے میں لے لی تھی۔
م م / ع ح  (ڈی پی اے، بیلگا)