گیارہ سو جرمن ڈاکٹر یوکرین میں خدمات کے لیے تیار

جرمن میڈیکل ایسوسی ایشن کے مطابق گو کہ یوکرین میں تعیناتی جان کو خطرات سے دوچار کر دینے سے عبارت ہے، اس کے باوجود گیارہ سو ڈاکٹروں نے اس مقصد کے لیے اپنی خدمات پیش کی ہیں۔ جرمن میڈیکل ایسوسی ایشن کے صدر کلاؤز رائن ہارٹ کے مطابق، ''زندگی کو خطرات کے باوجود اتنی بڑی تعداد میں طب کے پیشے سے وابستہ افراد کا خدمات پیش کرنا، یوکرین کے لیے اظہار یکجہتی کا اشارہ ہے۔‘‘

چار ہفتوں میں سات ہزار سے پندرہ ہزار تک روسی فوجی ہلاک، نیٹو

یورپی یونین کا اپنی دفاعی صلاحیت بڑھانے کا فیصلہ

جرمن میڈیا ادارے ریڈکسیون نیٹ ورک سے پیر کے روز بات چیت میں رائن ہارٹ نے کہا کہ یوکرینی افراد کی مدد کے لیے اپیل جاری کی گئی تھی، جس کے جواب میں ڈاکٹروں نے اپنے آپ کو خدمات کے لیے رجسٹرڈ کروایا۔ ایک آن لائن پورٹل پر ڈاکٹروں کی بیماروں اور زخمیوں کی طبی امداد کے لیے رجسٹریشن کھولی گئی تھی۔

رائن ہارٹ کے مطابق جرمن میڈیکل ایسوسی ایشن اس وقت جرمن دفتر خارجہ اور وفاقی وزراتِ صحت کے علاوہ یوکرین اور ہم سایہ ممالک میں قائم جرمن سفارت خانوں سے بات چیت میں مصروف ہے تاکہ ڈاکٹروں کی تعیناتی کا طریقہ کار طے ہو سکے۔

رائن ہارٹ نے بتایا، ''جوں ہی حکومت کی جانب سے انہیں بین الاقوامی ہیومینیٹیریئن فریم ورک کے تحت ڈاکٹروں کی تعیناتی سے متعلق مطلع کیا جائے گا، ہم ڈاکٹر مہیا کر دیں گے۔‘‘

جرمن وزیرصحت  نے اپنے ایک ٹوئٹر پیغام میں لکھا ہے، ''ہم پوری کوشش کر رہے ہیں کہ ان ڈاکٹروں کو اس طرح تعینات کریں کہ یہ اپنی زندگیاں خطرے میں ڈالے بغیر امدادی خدمات انجام دے سکیں۔‘‘

وزیر صحت نے بتایا کہ یوکرین اور ہم سایہ ممالک کے درمیان انتہائی قریبی تعاون کا سلسلہ جاری ہے۔ یوکرین سے بیمار اور زخمی افراد کو فضائی طریقے سے جرمنی سمیت مختلف یورپی ممالک منتقل کیا جا رہا ہے۔

یہ بات اہم ہے کہ پچھلے قریب دو ماہ سے روس کی یوکرین میں عسکری مداخلت جاری ہے اور اس روسی کارروائی کے نتیجے میں ہزاروں افراد ہلاک اور زخمی ہو چکے ہیں۔

ع ت، ب ج (ڈی پی اے)