لبنان میں تازہ حملے کی عالمی سطح پر مذمت

خبر رساں ادارے اے ایف پی نے مقامی میڈیا کا حوالہ دیتے ہوئے بتایا ہے کہ جمعرات کے دن یہ بم دھماکا ایران نواز شیعہ تنظیم حزب اللہ کے زیر اثر ایک علاقے میں ہوا۔ وزارت داخلہ نے ابتدائی رپورٹوں کے حوالے سے بتایا ہے کہ یہ ایک خود کش حملہ ہو سکتا ہے تاہم اس حوالے سے مزید حقائق جاننے کے لیے تفتیشی عمل جاری ہے۔ لبنانی طبی حکام نے ابتدائی طور پر اس واقعے میں ہلاک ہونے والوں کی تعداد چار بتائی تھی تاہم بعدازاں دو شدید زخمی افراد ہسپتال میں جان کی بازی ہار گئے۔

لبنانی فوج کی طرف سے بتایا گیا ہے کہ اس بم حملے میں بیس کلو گرام بارودی مواد استعمال کیا گیا تھا۔ یہ امر اہم ہے کہ ابھی کچھ ہفتوں قبل ہی اس علاقے میں واقع ایرانی سفارتخانے پر ہوئے دوہرے بم دھماکوں میں کم ازکم پچیس افراد مارے گئے تھے۔

حزب اللہ کے سیاسی دفتر سے دو سو میٹر دور ہوئے اس تازہ حملے پر تبصرہ کرتے ہوئے اس تنظیم کی طرف سے ایسی خبروں کو مسترد کر دیا گیا ہے کہ اس کارروائی میں اس کے ممبران کو نشانہ بنانے کی کوشش کی گئی ہے۔ حزب اللہ نے اس حملے کے لیے کسی کو بھی قصوروار قرار نہیں دیا ہے۔ حزب اللہ کے نائب سربراہ شیخ نعیم قاسم نے خبردار کیا ہے کہ اگر کسی سیاسی سمجوتے پر اتفاق رائے نہیں کیا جاتا تو لبنان تباہی کی طرف جا سکتا ہے، ’’اگر ہم صف بندیاں ختم نہیں کر پائے، تو ہم لبنان کو نہیں بچا سکتے۔‘‘

ادھر لبنان کے نگران وزیرخارجہ عدنان منصور نے کہا ہے کہ یہ ایک دہشت گردانہ حملہ تھا۔ حزب اللہ کے قریب سمجھے جانے والے منصور نے مزید کہا، ’’تمام دھماکوں کے بیچ صرف ایک ہی تعلق ہے کہ یہ دہشت گردی کی کارروائیاں ہیں، جو کسی جواز کے بغیر لبنان کے کسی بھی مقام پر کی جا سکتی ہیں۔‘‘

لبنانی صدر میشائل سلیمان نے بھی اسے دہشت گردی کی کارروائی قرار دیتے ہوئے زور دیا ہے کہ ملک کے تمام منقسم رہنما مکالمت کا آغاز کریں۔ امریکی اسٹیٹ ڈیپارٹمنٹ نے اس بم حملے کی مذمت کرتے ہوئے کہا ہے، ’’ہم اطراف پر زور دیتے ہیں کہ وہ ایسے ردعمل سے احتراز کریں، جس کے نتیجے میں تناؤ میں مزید اضافہ ہو سکتا ہے اور لبنان کے استحکام اور شہریوں کی جانوں کو خطرات لاحق ہو سکتے ہیں۔‘‘

اسی طرح نیو یارک میں اقوام متحدہ کی سلامتی کونسل نے بھی بیروت میں ہوئی اس تازہ دہشت گردانہ کارروائی کی شدید مذمت کی گئی ہے۔ اقوام متحدہ کے سربراہ بان کی مون نے کہا ہے کہ وہ لبنان میں بڑھتے ہوئے تشدد کے واقعات پر سخت تشویش کا شکار ہیں۔

یاد رہے کہ حزب اللہ کی طرف سے شام میں جاری جنگ میں صدر بشار الاسد کی طرف سے باقاعدہ طور پر لڑنے کے اعلان کے بعد سے جنوبی بیروت میں یہ چوتھا حملہ تھا۔ بیروت میں واقع کارنیگی مڈل ایسٹ سینٹر کی سربراہ لینا خطاب نے اس تازہ حملے پر تبصرہ کرتے ہوئے کہا ہے کہ اس سے معلوم ہوتا ہے کہ شامی تنازعہ کس طرح لبنان پر اثر انداز ہو رہا ہے۔