صدر پوٹن جلد ہی نیٹو کے رکن ملک ترکی کا دورہ کریں گے، ماسکو

روسی نیوز ایجنسی انٹرفیکس کے مطابق صدر ولادیمیر پوٹن اور ترک صدر رجب طیب ایردوان نے اتفاق کیا ہے کہ روسی رہنما جلد ہی ترکی کا دورہ کریں گے۔ گزشتہ برس فروری میں یوکرین پر حملہ کرنے کے بعد صدر پوٹن کا نیٹو کے کسی رکن ملک کا یہ پہلا دورہ ہو گا۔ یوکرین جنگ کے آغاز کے بعد سے صدر پوٹن نے شاذ و نادر ہی روس سے باہر سفر کیا ہے۔

روس کو مہلک ڈرون کون فراہم کر رہا ہے؟

انٹرفیکس نے کریملن کے خارجہ پالیسی کے مشیر یوری اوشاکوف کا حوالہ دیتے ہوئے لکھا ہے، '' یہ دعوت ترک صدر کی طرف سے دی گئی ہے۔ پوٹن اور ایردوآن نے اس بات پر اتفاق کیا کہ یہ دورہ مستقبل قریب میں ہوگا لیکن ہم نے ابھی تک کسی مخصوص دن یا مخصوص تاریخ کے بارے میں بات نہیں کی۔‘‘

 ترکی نے روس پر اقتصادی پابندیاں لگانے میں اپنے مغربی اتحادیوں کا ساتھ دینے سے انکار کر دیا تھا لیکن اس نے یوکرین کو ہتھیار بھی فراہم کیے ہیں اور روس سے یوکرین کی خودمختاری کا احترام کرنے کا مطالبہ کر چکا ہے۔

انقرہ نے حال ہی میں قیدیوں کے تبادلے میں بھی مدد فراہم کی تھی اور اقوام متحدہ کے ساتھ مل کر جولائی 2022 میں بحیرہ اسود کے راستے یوکرینی بندرگاہوں سے اناج کی محفوظ برآمد کے ایک معاہدے میں بھی ثالث کا کردار ادا کیا تھا۔

بین الاقوامی فوجداری عدالت (آئی سی سی) نے مارچ میں یوکرین میں مبینہ جنگی جرائم کے الزام میں صدر پوٹن کی گرفتاری کے لیے وارنٹ جاری کیے تھے، یعنی اگر وہ بیرون ملک سفر کرتے ہیں تو انہیں گرفتار کیے جانے کا خطرہ ہو سکتا ہے۔ لیکن ترکی اس معاہدے کا حصہ نہیں ہے اور صدر پوٹن بلاخوف وہاں کا سفر کر سکتے ہیں۔

ا ا / ع ت (روئٹرز، اے ایف پی)