جرمنی اور اٹلی کے مابین کئی مسائل پر اتفاق رائے متوقع

جرمن حکومتی ذرائع کے مطابق وفاقی چانسلر اولاف شولس اور اطالوی وزیر اعظم جورجیا میلونی برلن میں آج بدھ کے روز ہونے والے ایک بین الحکومتی اجلاس میں توانائی، دفاع اور دیگر شعبوں سے جڑے مسائل کے بارے میں باہمی تعاون بڑھانے پر اتفاق کریں گے۔

میلونی ایک اطالوی وفد کے ساتھ اس وقت برلن میں ہیں، جہاں آج ایک عشائیے کے بعد وہ چانسلر شولس کے ساتھ مل کر ایک مشترکہ پریس کانفرنس سے خطاب بھی کریں گی۔

اس سے قبل منعقد ہونے والے بین الحکومتی اجلاس میں یہ دونوں رہنما متوقع طور پر 31 صفحات پر مشتمل ایک ایکشن پلان پر دستخط بھی کریں گے۔

خبر رساں ادارے روئٹرز کے پاس موجود اس پلان کی ایک کاپی کے مطابق آج کے اجلاس میں جرمنی اور اٹلی آپس میں مذاکرات بڑھانے اور اہم پالیسیوں میں تعاون میں اضافے پر اتفاق کریں گے۔ اس پلان میں غیر قانونی ترک وطنکے مسئلے پر مل کر کام کرنے کا بھی ذکر کیا گیا ہے۔

لیکن یہ دستاویز صرف ایک پلان ہے نہ کہ کوئی باقاعدہ معاہدہ، جس سے ظاہر ہوتا ہے کہ جرمنی اور اٹلی کے مابین یہ اتحاد اتنا مضبوط نہیں ہو گا جتنا ان ممالک کا کئی دوسرے یورپی ممالک سے ہے۔ پھر بھی یہ ان دونوں ممالک کے درمیان گزشتہ سات سال کے دوران اپنی نوعیت کا پہلا اتحاد ہو گا۔

جرمن چانسلر شولس کا تعلق سینٹر لیفٹ جماعت سوشل ڈیموکریٹک پارٹی سے ہے جبکہ اٹلی کی میلونی کا تعلق دائیں بازو کی جماعت برادرز آف اٹلی سے ہے۔ اسی لیے ان دونوں رہنماؤں اور ان کی قیادت میں ملکی حکومتوں کے مابین سیاسی قربت اور اتحاد بظاہر ناممکن سی بات لگتے تھے۔

لیکن یورپ کو اس وقت یوکرینی جنگ اور غیر قانونی ترک وطن جیسے مسائل کا سامنا ہے، اور ایسے میں یورپی ممالک توانائی کے نئے ذرائع کے لیے بھی کوشاں ہیں۔ اسی بنا پر ان دونوں رہنماؤں کے باہمی روابط حالیہ دنوں میں بڑھے ہیں۔

جرمنی نے اٹلی سے تارکین وطن لینے کا رضاکارانہ منصوبہ معطل کر دیا

جرمنی اور اٹلی بالخصوص ان دونوں ممالک کے درمیان ہائیڈروجن اور دیگر گیسوں کی سپلائی کے لیے ایک پائپ لائن کی تعمیر اور غیر قانونی ترک وطن سے نمٹنے کی حکمت عملی کے سلسلے میں ایک دوسرے کے قریب آئے ہیں۔

حالیہ کچھ عرصے کے دوران جرمنی نے بھیتارکین وطن کی غیر قانونی آمدکے بارے میں زیادہ سخت موقف اختیار کیا ہے، جو کہ اس معاملے میں موجودہ اطالوی حکومت کے موقف سے کافی حد تک مطابقت رکھتا ہے۔

جرمنی کی جانب سے اس بارے میں زیادہ سخت رویہ ملک میں غیر قانونی طور پر داخل ہونے والے غیر ملکیوں کی تعداد میں اضافے اور مقامی حکام کو اس مسئلے سے نمٹنے میں درپیش دشواری کے تناظر میں اپنایا گیا ہے۔

م ا / م م (روئٹرز)