تھائی لینڈ میں نوجوان جرمن خاتون سیاح کا ریپ کے بعد قتل

تھائی لینڈ کے دارالحکومت بنکاک سے پیر آٹھ اپریل کو ملنے والی جرمن نیوز ایجنسی ڈی پی اے کی رپورٹوں کے مطابق اس ‌خاتون سیاح کا تعلق جرمنی کے شمالی صوبے لوئر سیکسنی سے تھا اور اس کی عمر 26 برس تھی۔ یہ نوجوان سیاح اکیلی ہی تھائی لینڈ کی سیاحت کے لیے گئی تھی۔ اس دوران خلیج تھائی لینڈ کے علاقے میں جب یہ خاتون ملکی دارالحکومت بنکاک سے 75 کلومیٹر کے فاصلے پر واقع چھوٹے سے جزیرے کو سی چانگ کی سیر کو گئی، تو وہاں اس ملزم نے پہلے اسے جنسی زیادتی کا نشانہ بنایا اور پھر اسے قتل کر دیا۔

تھائی پولیس کے ایک ترجمان نے بنکاک میں ڈی پی اے کو بتایا کہ ملزم کی عمر 24 سال ہے اور اس نے اس جرمن سیاح پر جنسی حملہ اور اس کا قتل اتوار سات اپریل کو اس وقت کیا، جب وہ ایک دن کی سیر کے لیے بنکاک سے اس جزیرے پر گئی تھی۔ پولیس نے یہ بھی بتایا کہ یہ یورپی خاتون ایک فیری کے ذریعے کو سی چانگ نامی جزیرے پر پہنچی تھی، جہاں اس نے جزیرے کی سیر کے لیے ایک مقامی دکاندار سے ایک سکوٹر بھی کرائے پر لیا تھا۔

تھائی میڈیا کی رپورٹوں کے مطابق اس جزیرے کی سیر کے دوران ہی 26 سالہ مقتولہ نے 24 سالہ مبینہ ملزم سے کچھ پوچھنے کے لیے تھوڑی سی بات چیت بھی کی تھی، جس کے بعد اس جرمن خاتون کا کسی دوسرے مقامی یا غیر ملکی باشندے سے کوئی رابطہ نہیں ہوا تھا۔

اس خاتون سیاح کی طرف سے جزیرے پر ایک سکوٹر کرائے پر لینے کے چند گھنٹے بعد ایک دوسرے غیر ملکی سیاح نے اتفاقاﹰ دیکھا کہ خلیج تھائی لینڈ کے پانیوں میں جزیرے کے ساحل کے پاس پتھروں کے نیچے کوئی انسانی لاش چھپائی گئی تھی۔ اس نے پولیس کو اطلاع کی تو پولیس نے موقع پر پہنچ کر اس خاتون کی لاش برآمد کر لی۔

بعد ازاں پولیس نے یہ بھی بتایا کہ ملزم اسی جزیرے کا ایک ایسا رہائشی ہے، جو مقامی سطح پر کوڑا کرکٹ جمع کر کے اپنے لیے معمولی سی رقم کما لیتا تھا۔ یہ جرمن خاتون 23 مارچ کو سیاحت کے لیے تھائی لینڈ گئی تھی اور اس نے زیادہ تر وقت بنکاک کے نواح میں سی راچا نامی شہر کے ایک مقامی ہوٹل میں قیام کیا تھا۔

تھائی لینڈ کا شمار جرمن سیاحوں کی یورپ سے باہر پسندیدہ ترین سیاحتی منزلوں میں ہوتا ہے۔ جرمن باشندے خاص طور پر تھائی لینڈ کے مختلف جزائر پر تعطیلات منانے کے لیے جنوبی مشرقی ایشیا کی اس بادشاہت کا رخ کرتے ہیں۔ تھائی حکومت کے اعداد و شمار کے مطابق گزشتہ برس سیاحت کے لیے تھائی لینڈ جانے والے جرمن باشندوں کی تعداد تقریباﹰ نو لاکھ رہی تھی۔

م م / ع ح / ڈی پی اے