بیروت میں ہلاکت خیز حملے، ذمہ دار سنی شدت پسند گروہ

لبنان کے شدت پسند مسلمانوں کے گروپ عبداللہ عزام بریگیڈ نے آج بدھ کے دن بیروت میں کیے گئے دوہرے حملے کی ذمہ داری قبول کرنے کے علاوہ انیس نومبر کے اُس حملے کو بھی اپنی ہی کارروائی قرار دیا ہے، جس میں لبنانی دارالحکومت میں واقع ایرانی سفارتخانے کو نشانہ بنایا گیا تھا۔ اُس واقعے میں بھی دوہرا خود کش حملہ کیا گیا تھا، جس کے نتیجے میں 23 افراد مارے گئے تھے۔ خبر رساں ادارے روئٹرز نے بتایا ہے کہ اس گروہ نے اپنے ایک ٹوئٹر پیغام میں خبردار کیا ہے کہ اگر شیعہ تنظیم حزب اللہ نے شام میں فعال اپنے جنگجو واپس نہ بلائے تو ایسے مزید حملے کیے جائیں گے۔

یہ بات اہم ہے کہ لبنان کی ایرانی حمایت یافتہ شیعہ ملیشیا حزب اللہ کے سیکنڑوں جنگجو شام میں صدر بشار الاسد کی فورسز کے شانہ بشانہ باغیوں کے خلاف محاذ آرا ہیں۔ اس تناظر میں عبداللہ عزام بریگیڈ نے اپنے پیغام میں کہا، ’’ہم اس وقت تک ایران اور لبنان میں حزب اللہ کے سکیورٹی، سیاسی اور عسکری مراکز پر اپنے حملے جاری رکھیں گے، جب تک ہمارے دو مطالبات منظور نہیں کیے جاتے۔ پہلا مطالبہ یہ ہے کہ شام سے حزب اللہ کے جنگجو واپس بلائے جائیں اور دوسرا یہ کہ لبنان میں مقید ہمارے تمام ساتھیوں کو رہا کیا جائے۔‘‘

روئٹرز نے بیروت سے موصولہ رپورٹوں کے حوالے سے بتایا ہے کہ بدھ کے دن کیے گئے خود کش حملوں میں شہر میں ایرانی کلچرل سینٹر کو نشانہ بنایا گیا۔ بتایا گیا ہے کہ اس کارروائی میں دو خود کش حملہ آور شریک ہوئے، جن میں سے ایک کار میں جبکہ دوسرا ایک موٹر سائیکل پر سوار تھا۔ انیس نومبر کو ایرانی سفارتخانے پر بھی ایسی ہی حکمت عملی کے ساتھ حملہ کیا گیا تھا۔

عینی شاہدین کے مطابق دھماکے اتنے شدید تھے کہ گرد و نواح کے مکانات کی کھڑکیوں کے شیشے ٹوٹ گئے۔ جہاں حملے کیے گئے ہیں، وہاں قریب ہی ایک یتیم خانہ بھی تھا۔ روئٹرز نے بتایا ہے کہ حملوں کے نتیجے میں بچے خوفزدہ ہو گئے۔ ہلاک شدگان میں متعدد بچے بھی شامل ہیں۔

شامی خانہ جنگی نے لبنان پر بھی منفی اثرات مرتب کیے ہیں، جو ابھی تک سن 1975 سے 1990ء تک جاری رہنے والی خانہ جنگی کے اثرات پر قابو پانے کی کوشش میں ہے۔ شامی باغیوں کی زیادہ تر تعداد سنی فرقے سے تعلق رکھتی ہے جب کہ صدر اسد کا تعلق علوی مسلک سے ہے، جو شیعہ اسلام کی ایک شاخ تصور کیا جاتا ہے۔ جب سے شام میں بحرانی حالات پیدا ہوئے ہیں، تب سے لبنان میں بھی سنی جنگجو زیادہ فعال ہو گئے ہیں۔