باغیوں کے زیرِ قبضہ علاقے چھڑوانے کا منصوبہ تیار ہے، یوکرائن

یوکرائن کے عسکری حکام کا کہنا ہے کہ وہ ڈونیٹسک اور لوہانسک کا کنٹرول واپس حاصل کرنے کا منصوبہ بنا چکے ہیں اور باغی حیرت زدہ رہ جائیں گے۔ اس تناظر میں فوج کے ترجمان آندری لیسینکو نے کہا: ’’یوکرائن کے علاقے دہشت گردوں سے واپس لینے کے لیے منصوبہ بنا لیا گیا ہے۔‘‘

انہوں نے کہا کہ اس منصوبے کا انحصار اس بات پر نہیں کہ باغی اپنے دفاع کے لیے تیار ہیں یا نہیں۔ اس کے برعکس علیحدگی پسندوں نے کہا ہے کہ باقاعدگی سے ان کے ساتھ ایسے لوگ شامل ہوتے جا رہے ہیں جو کییف حکومت کے خلاف لڑنے کے لیے تیار ہیں۔

ان کا کہنا ہے کہ روس کے ایک فوجی افسر ایگور اسٹریلکوف کی جانب سے اپیل کے بعد مزید لوگ خود کو لڑائی کے لیے پیش کر رہے ہیں۔ انہوں نے کہا کہ منگل سے تقریباﹰ تین سو رضاکار سامنے آئے ہیں۔ باغیوں کے مطابق اس سے قبل یومیہ بیس سے پچیس لوگ لڑائی میں حصہ لینے کے لیے ان کے ساتھ شامل ہو رہے تھے۔

یوکرائن کی فوج نے ہفتے کو سلاویانسک کا قبضہ چھڑا لیا تھا تاہم اس کے بعد باغی تقریباﹰ ایک ملین کی آبادی والے شہر ڈونیٹسک میں نئے سرے سے منظم ہو گئے ہیں۔ ڈونیٹسک کے ایک مرکزی اسکوائر پر اتوار کو روس نواز باغیوں نے ایک ریلی بھی نکالی تھی جس میں ان کے ہزاروں حامی شریک ہوئے۔ وہ روس اور خود ساختہ ڈونیٹسک پیپلز ریپبلک کے پرچم اٹھائے ہوئے تھے۔

روس کے ساتھ سرحد پر واقع شہر لوہانسک میں بھی اہم عمارتیں باغیوں کے قبضے میں ہیں۔ خبر رساں ادارے روئٹرز کے مطابق باغیوں کا کہنا ہے کہ روس کے ایک فوجی افسر ایگور اسٹریلکوف نے ڈونیٹسک کے دفاع کی ذمہ داری سنبھال لی ہے۔ ان کے مطابق اسٹریلکوف اس سے پہلے سلاویانسک میں باغیوں کی قیادت کر رہے تھے۔

دوسری جانب یوکرائن کے صدر پیٹرو پوروشینکو نے باغیوں کے خلاف لڑائی میں فضائی حملوں اور توپخانے کے استعمال کو خارج از امکان قرار دے دیا ہے۔ انہوں نے کہا: ’’ڈونیٹسک کی گلیوں میں لڑائی نہیں ہو گی۔‘‘

یوکرائن کی فوج نے ویک اینڈ پر سلاویانسک کے ساتھ ساتھ آرتیموفسک اور دروس کوفکا کا کنٹرول بھی حاصل کر لیا تھا۔ فوج نے اس کے فوراﹰ بعد ہی اعلان کر دیا تھا کہ وہ علیحدگی پسندوں کے زیرِ قبضہ شہروں ڈونیٹسک اور لوہانسک کا محاصرہ کرنے کا ارادہ رکھتی ہے تاکہ باغیوں کو حکومتی شرائط تسلیم کرنے پر مجبور کیا جا سکے۔