ایرانی سرحدی محافظوں پر پاکستانی شہری کے قتل کا الزام

جرمن خبر رساں ادارے ڈی پی اے نے پاکستانی حکام کے حوالے سے بتایا ہے کہ ان تینوں ایرانی سرحدی محافظوں کے مستقبل کے بارے میں پاکستانی اور ایرانی حکام کے مابین ہونے والے مذاکرات ناکام ہو گئے ہیں۔ ایرانی حکومت نے زور دیا تھا کہ ان سرحدی محافظوں کو رہا کرکے تہران حکومت کے سپرد کر دیا جائے۔

ان ایرانی بارڈر گارڈز نے ہفتے کے دن پاکستانی حدود میں داخل ہو کر ایک گاڑی پر فائرنگ کر دی تھی، جس کے نتیجے میں مبینہ طور پر ایک نوجوان ہلاک جبکہ دوسرا زخمی ہو گیا تھا۔ یہ واقعہ صوبہ بلوچستان کی ڈسٹرکٹ واشک کے ماشکیل نامی علاقے میں پیش آیا تھا۔

مقامی پولیس کے ایک اعلیٰ اہلکار عبد الملک نے ڈی پی اے کو بتایا، ’تینوں ایرانی باشندے ہماری سکیورٹی فورسز کی حراست میں ہیں اور ہم جلد ہی ان کو مقامی کورٹ میں پیش کر دیں گے تاکہ ان کے خلاف باقاعدہ طور پر مقدمے کی کارروائی شروع کی جا سکے‘۔

عبد الملک نے مزید بتایا ہے کہ ہلاک ہونے والے پاکستانی شہری کے گھر والوں نے ان ایرانی سرحدی محافظوں کے خلاف رپورٹ درج کروائی ہے اور پولیس اس حوالے سے تحقیقات جاری رکھے ہوئے ہے۔

تہران حکومت نے ان ایرانی گارڈز کی فوری طور پر رہائی کا مطالبہ کرتے ہوئے کہا ہے کہ وہ دانستہ طور پر پاکستانی سرحدی علاقے میں داخل نہیں ہوئے تھے۔ ایرانی حکام نے مزید کہا ہے کہ پاکستانی سرحد میں داخل ہو جانے والے یہ ایرانی سرحدی محافظ ان اسمگلروں کا تعاقب کر رہے تھے، جنہوں نے ایرانی سرحد میں داخل ہونے کی کوشش کی تھی۔

ان ایرانی گارڈز کی رہائی کے لیے منگل کو پاکستانی اور ایرانی حکام کے مابین مذاکرات ہوئے تھے۔ اس دوران ان ایرانی گارڈز کی رہائی کے لیےکسی ڈیل تک پہنچنے کی کوشش کی گئی تھی تاہم پاکستانی حکام نے تصدیق کی ہے کہ یہ مذاکرات ناکام ہو گئے ہیں۔ واضح رہے کہ پاکستان اور ایران کے مابین سرحد قریب آٹھ سو کلو میٹر طویل ہے۔

رپورٹ: عاطف بلوچ

ادارت: شادی خان سیف