اوباما کی نئی عسکری حکمتِ عملی کے تحت فوج میں کمی

ابھی امريکی صدر باراک اوباما نے فوجی اخراجات ميں کمی کا منصوبہ پيش بھی نہيں کيا تھا کہ طيارہ ساز کمپنی بوئنگ نے ملازمتوں ميں تخفيف اور اپنا ايک کارخانہ بند کر دينے کی دھمکی دے دی۔ ريپبليکن پارٹی کے عہدہء صدارت کے مقبول اميد وار رک سينٹورم نے بھی اس کی مخالفت کرتے ہوئے کہا کہ يہ اوباما کا مخصوص طريقہء کار ہےکہ وہ اہم رياستی اخراجات ميں کمی کرکے فلاحی رياستی منصوبوں پر زيادہ رقم خرچ کرنا چاہتے ہيں۔

ليکن نيٹو کی کوسووو جنگ کے سابق کمانڈر اور ڈيموکريٹ جنرل ويسلی کلارک نے اس کی حمايت کرتے ہوئے کہا کہ صحيح دفاعی حکمت عملی تو ضروری ہے ليکن زيادہ بڑی فوج ضروری نہيں ہے۔

صدر اوباما نے اپنے فوجی بچت کا منصوبہ امريکی وزارت دفاع ميں خود پيش کيا اور کہا کہ اس کی وجہ امريکی بجٹ کا بھاری خسارہ ہے۔ انہوں نے کہا کہ عراق کی جنگ کے خاتمے اور افغانستان جنگ کے مجوزہ خاتمے کی وجہ سے فوج کو نئے سرے سے ترتيب دينا اور مستقبل کی ذمہ داريوں کا تعين کرنا ہو گا: ’’خفيہ ادارے، دہشت گردی کے خلاف جنگ، نگرانی اور جاسوسی، بڑے پيمانے پر تباہی پھيلانے والے ہتھياروں کا مقابلہ اور ايسے علاقوں میں کارروائی کرنا جہاں ہمارے دشمن ہميں داخل نہيں ہونے دينا چاہتے۔‘‘

اس ليے خصوصی دستوں، ڈرونز اور سائبر وار پر زيادہ رقم خرچ کی جائے گی۔ دوسری طرف فوج ميں 50 ہزار سے بھی زيادہ کی تخفيف کی جائے گی۔ اس کے ساتھ ہی نئے غيرملکی اہداف پر زيادہ توجہ دی جائے گی۔ اوباما نے کہا کہ ايشيا بحرالکاہل کے علاقے ميں امريکی موجودگی ميں اضافہ کيا جائے گا اور يہی پاليسی مشرق وسطیٰ کے بارے ميں بھی ہو گی۔ انہوں نے کہا کہ يورپ ميں امريکی فوج ميں 4000 کی تخفيف کی جائے گی۔ ساتھ ہی انہوں نے يہ بھی کہا: ’’ ہماری فوج کم ہو جائے گی، ليکن دنيا کو يہ معلوم ہونا چاہيے کہ امريکہ اپنی فوجی برتری کو قائم رکھنا چاہتا ہے، ايسے فوجی دستوں کے ذريعے جو برق رفتار اور لچکدار اور تمام حالات اور خطرات کا مقابلہ کرنے کے ليے تيار ہوں گے۔‘‘

صدر اوباما نے کہا کہ مستقبل ميں بھی امريکی دفاعی بجٹ دنيا ميں اُس کے بعد آنے والے دس مجموعی فوجی بجٹوں سے زيادہ ہوگا۔

رپورٹ: ريوڈيگر پاؤلرٹ، واشنگٹن / شہاب احمد صديقی

ادارت: ندیم گِل