امریکا دنیا کو آٹھ کروڑ کووڈ ویکسین عطیہ کرے گا

امریکی صدر جو بائیڈن نے جمعرات کے روز اعلان کیا کہ امریکا کورونا وائرس کے اپنے غیر مستعمل ویکسینز کا 75 فیصد اقوام متحدہ کے تحت کام کرنے والے ادارے کوویکس الائنز کو عطیہ کرے گا جبکہ جون کے اواخر تک اس کا عالمی سطح پر آٹھ کروڑ ویکسین فراہم کرنے کا منصوبہ ہے۔

صدر جو بائیڈن نے ایک بیان میں کہا”دنیا میں کہیں بھی جب تک یہ وبا موجود رہے گی اس وقت تک امریکی عوام کے لیے خطرہ برقرار رہے گا۔" انہوں نے کہا کہ امریکا نے عہد کیا ہے کہ وہ ویکسین کی فراہمی کے اقدامات میں اسی طرح کی تیزی بین الاقوامی سطح پر بھی لائے گا جیسی امریکا کے اندر دکھائی گئی تھی۔

امریکا اپنے باقی ماندہ کووڈ ویکسینز میں سے 75 فیصد بین الاقوامی برادری کے لیے عطیہ کرے گا جبکہ بقیہ 25 فیصد کو اپنی ہنگامی ضرورت کے لیے رکھے گا اور اپنے دوست ممالک کو بھی فراہم کرے گا۔

یہ ویکسین کہاں جائیں گی؟

اس بات کا فیصلہ امریکا کرے گا کہ یہ ویکسین کن ملکوں کو بھیجے جائیں گے۔

امریکا کے قومی سلامتی مشیر جیک سولیوان نے کہا کہ کوویکس کے ذریعہ ویکسین کن ملکوں کو دی جائیں گی اس کا فیصلہ بہر حال امریکا کرے گا۔ انہوں نے کہا”ہم اس کے ذریعہ کوئی رعایتیں حاصل کرنے کی کوشش نہیں کر رہے ہیں، نہ ہی کچھ چھیننے کی کوشش کر رہے ہیں، نہ ہی کوئی شرائط عائد کر رہے ہیں۔ جیسا کہ ویکسین مہیا کرانے والے بعض دیگر ممالک کر رہے ہیں۔ ہم ایسا کچھ بھی نہیں کر رہے ہیں۔"

جیک سولیوان نے مزید کہا”ہم یہ خوراکیں ان ممالک کو مفت اور واضح طورپر عطیہ کر رہے ہیں اور اس کا واحد مقصد لوگوں کی صحت کی صورت حال بہتر بنانا اور وبا کے خاتمے میں مدد کرنا ہے۔"

اس منصوبے کے تحت ابتدائی ڈھائی کروڑ خوراکوں میں سے ایک کروڑ نوے لاکھ کوویکس کو، ساٹھ لاکھ جنوبی اور وسطی امریکا کو، ساٹھ لاکھ ایشیا کو اور پچاس لاکھ افریقہ کو دی جائیں گی۔

 وہائٹ ہاؤس کی ہدایت پر جن ممالک کو ابتدا میں ویکسین دی جائیں گی ان میں میکسیکو، کینیڈا، جنوبی کوریا، مغربی کنارہ، غزہ، بھارت، یوکرائن، کوسوو، ہیٹی، جارجیا، مصر، اردن، عراق اور یمن کے علاوہ کورونا کی جنگ میں اقوامِ متحدہ کے صفِ اول کے کارکن بھی شامل ہیں۔

میکسیکو کے صدر آندریس مینویل لوپیز اوبریڈر نے جانسن اینڈ جانسن ویکسین کی دس لاکھ خوراک کے عطیہ کا خیر مقدم کیا ہے۔

امریکا پر ویکسین کی ذخیرہ اندوزی کا الزام

امریکی صدر نے ویکسین عطیہ کرنے کا یہ فیصلہ ایسے وقت کیا ہے جب بیشتر ممالک میں ویکسین کی بے حد کمی ہے جبکہ امریکا میں ضرورت سے زیادہ موجود ہے۔

خبر رساں ایجنسی اے پی کے مطابق ویکسین مہیا کرنے کا یہ منصوبہ اس وقت آیا ہے جب امریکا میں درون ملک اس کی مانگ بہت کم ہوگئی ہے۔ تیریسٹھ فیصد سے زیادہ امریکیوں نے ویکسین کی کم از کم ایک خوراک لگوالی ہے۔ اور امریکا پر ویکسین دوسرے ملکوں کو فراہم کرنے کے لیے دباو بڑھ  گیا ہے۔

وائٹ ہاؤس نے کہا ہے کہ جن ڈھائی کروڑ خوراکوں کا جمعرات کو اعلان کیا گیا ہے وہ فائزر، موڈرنا اور جانسن اینڈ جانسن کی ویکسینز کے موجودہ وفاقی ذخیرے سے روانہ کر دی جائیں گی۔ اور آئندہ مہینوں میں توقع ہے کہ مزید خوراکیں روانہ کرنے کے لئے موجود ہوں گی۔

 امریکا کی طرف سے ویکسین عطیہ کرنے کے فیصلے سے کوویکس کی سرگرمیوں کا دائرہ کافی بڑھ جائے گا۔ اس بین الاقوامی ادارے نے  127 ملکوں کو تقریباً آٹھ کروڑ ویکسین فراہم کی ہیں۔ کوویکس کا قیام دنیا کے 92 انتہائی غریب ملکوں کی تقریباً تیس فیصد آبادی کو ویکسین کی فراہمی یقینی بنانے کے مقصد سے عمل میں آیا تھا۔

 ج ا / ص ز (اے ایف پی، اے پی)