افغانستان میں دو اور امریکی فوجی مارے گئے

افغان دارالحکومت کابل سے جمعرات بائیس اگست کو ملنے والی نیوز ایجنسی ایسوسی ایٹڈ پریس کی رپورٹوں کے مطابق ہندو کش کی عشروں سے بدامنی کی شکار اس ریاست میں مغربی دفاعی اتحاد نیٹو کے مشن 'ریزولیوٹ سپورٹ‘ کی طرف سے بدھ کو رات گئے بتایا گیا کہ مارے جانے والے ان امریکی فوجیوں کی ہلاکت کی تصدیق تو کی جا رہی ہے لیکن ان کی شناخت فی الحال ظاہر نہیں کی جائے گی۔

نیٹو کے ذرائع نے یہ بھی نہیں بتایا کہ ان دونوں امریکی فوجیوں کی موت کن حالات میں اور کہاں ہوئی؟ اس کی وجہ یہ ہے کہ عمومی فوجی طریقہ کار کے تحت اپنے فرائض کی انجام دہی کے دوران مارے جانے والے فوجیوں کی شناخت ظاہر کرنے سے قبل چوبیس گھنٹوں کے اندر اندر پہلے ان کے پسماندگان کو اطلاع دی جاتی ہے۔

بعد میں ایک امریکی فوجی اہلکار نے اپنی شناخت ظاہر نہ کرنے کی شرط پر اس بارے میں صرف اتنا بتایا کہ امریکی دستوں کے یہ دونوں ارکان چھوٹے ہتھیاروں سے ہونے والی ایک جھڑپ کے دوران ہلاک ہوئے۔

افغانستان میں 2400 سے زائد امریکی فوجی ہلاکتیں

امریکا پر نائن الیون کے دہشت گردانہ حملوں کے بعد 2001ء میں جب امریکا کی قیادت میں افغانستان میں طالبان کی حکومت کے خلاف کارروائی کے لیے فوجی مداخلت کی گئی تھی، تب سے اب تک اس ملک میں 2400 سے زائد امریکی فوجی مارے جا چکے ہیں۔

ہندو کش کی اس ریاست میں اگرچہ امریکا کو پہنچنے والا فوجی جانی نقصان اب مقابلتاﹰ بہت کم ہو چکا ہے، تاہم سال رواں کے دوران بھی وہاں اب تک امریکا کے کم از کم 14 فوجی ہلاک ہو چکے ہیں۔ سن 2001ء میں افغانستان میں فوجی مداخلت کے بعد 2014ء میں امریکا نے وہاں اپنا جنگی مشن باقاعدہ طور پر ختم کر دیا تھا۔ لیکن نیٹو کے ایک عسکری امدادی مشن کے تحت امریکا اب بھی طالبان عسکریت پسندوں اور 'اسلامک اسٹیٹ‘ کے جنگجوؤں کے خلاف لڑنے والی افغان حکومتی فورسز اور ان کی اتحادی مقامی عسکری قوتوں کو زمینی اور فضائی مدد فراہم کر رہا ہے۔

طالبان کے ساتھ امن معاہدے کی کوشش

امریکا کی کوشش ہے کہ افغانستان میں قیام امن کے لیے طالبان کے ساتھ کوئی باقاعدہ امن معاہدہ طے پا جائے۔ اس کے لیے قطر کے دارالحکومت دوحہ میں امریکا اور افغان طالبان کے نمائندوں کے مابین اب تک کئی مذاکراتی دور مکمل بھی ہو چکے ہیں۔

امریکا اور طالبان کی طرف سے کئی مرتبہ کہا جا چکا ہے کہ فریقین کسی ممکنہ معاہدے کے کافی قریب پہنچ چکے ہیں۔ لیکن ایسا کوئی معاہدہ تاحال طے نہیں پا سکا۔ واشنگٹن حکومت کے لیے یہ بات بھی سیاسی طور پر بہت بے چینی کا باعث ہے افغانستان میں امریکا کی جنگ، جو اس وقت اپنے 18 ویں سال میں ہے، امریکا کی طرف سے آج تک لڑی جانے والی طویل ترین جنگ بن چکی ہے۔

م م / ا ا / اے پی