ڈیرہ اسماعیل خان بم دھماکے میں 5 افراد ہلاک

پاکستان کے شمال مغربی شہر ڈیرہ اسماعیل خان میں جمعے کے روز پولیس کی ایک بس کے قریب ایک بم دھماکے میں کم از کم پانچ افراد ہلاک جبکہ 20 زخمی ہو گئے۔ پولیس کے مطابق ہلاک ہونے والے تمام افراد عام شہری ہیں جبکہ زخمیوں میں پولیس کانسٹیبل بھی شامل ہیں۔

ہلاک و زخمی افراد کی تعداد کی تصدیق کرتے ہوئے پولیس نے بتایا کہ بم کو ایک موٹر سائیکل میں نصب کیا گیا تھا۔

پولیس افسر گل شیر خان نے اس حوالے سے مزید بتایا کہ اس موٹر سائیکل کو ایک بس اڈے کے قریب کھڑا کیا گیا تھا۔ جب ایک بس، جس میں پولیس اہلکار سوار تھے، اس کے پاس سے گزری، تو اس میں نصب بم کو ریموٹ کنٹرول کے ذریعے اڑا دیا گیا۔

خان کا کہنا تھا کہ بس میں سوار پولیس اہلکار ڈیرہ اسماعیل خان سے قریب ہی واقع تکوارا کے علاقے جا رہے تھے۔

ریسکیو اہلکار بلال فیضی کے مطابق تمام زخمیوں کو جائے وقوعہ کے قریب ہی واقع ایک ہسپتال منتقل کیا گیا، اور ان میں سے تین کی حالت نازک ہے۔

اب تک کسی تنظیم نے دھماکے کی ذمےداری قبول نہیں کی ہے، مگر کالعدم تنظیم تحریک طالبان پاکستان (ٹی ٹی پی) کے شک کے دائرے میں آنے کے قوی امکانات ہیں چونکہ 2022ء سے ٹی ٹی پی کی جانب سے سیکیورٹی اہلکاروں پر کیے جانے والے حملوں میں اضافہ دیکھا گیا ہے۔  

پاکستانی حکام کا کہنا ہے کہ 2021ء میں افغانستان میں طالبان کی حکومت قائم ہونے کے بعد سے وہاں حکومت مخالف عناصر آزادانہ رہ رہے ہیں اور اس طرح ان کے حوصلے بڑھے ہیں۔  

ڈیرہ اسماعیل خان کے قریب جنوبی وزیرستان بھی واقع ہے، جو کبھی عسکریت پسندوں کا گڑھ ہوا کرتا تھا۔

سن 2014 میں آرمی پبلک اسکول پر حملے کے بعد سے پاکستانی فوج نے اس خطے میں بڑے پیمانے پر آپریشنز کا آغاز کیا تھا، جس کے بعد کئی سال پہلے اعلان گیا تھا کہ ان علاقوں میں مقامی اور غیر ملکی دہشت گردوں کا خاتمہ کر دیا گیا ہے۔

مگر اس اعلان کے بعد بھی ان علاقے میں دہشت گرد حملوں کا سلسلہ جاری رہا ہے، جس کے باعث تحریک طالبان پاکستان کے پھر سے منظم ہونے کے خدشات بڑھ رہے ہیں۔

 

م ا /ع ا(ای۔ پی)