مصر میں پولیس ہیڈ کوارٹرز پر ہلاکت خیز بم حملہ

نیوز ایجنسی ایسوسی ایٹڈ پریس کے مطابق ہلاک شدگان میں اکثریت پولیس اہلکاروں کی ہے۔ یہ کار بم دھماکا اتنا شدید تھا کہ پولیس ہیڈ کوارٹرز کی پانچ منزلہ عمارت جزوی طور پر زمیں بوس ہو گئی۔ امدادی کارکنوں کے بقول کافی زیادہ امکان ہے کہ بہت سے افراد زندہ یا مردہ اس عمارت کے ملبے تلے دبے ہوئے ہیں۔

نیوز ایجنسی اے ایف پی نے اپنی رپورٹوں میں لکھا ہے کہ مصر میں آج کا یہ حملہ اس سال جولائی میں صدر محمد مرسی کی ملکی فوج کے ہاتھوں برطرفی کے بعد سے اب تک کیا جانے والا سب سے خونریز حملہ ہے۔ حکام کے بقول یہ حملہ ایک ایسے وقت پر کیا گیا ہے جب نئے ملکی آئین کی منظوری کے لیے عوامی ریفرنڈم میں چند ہی ہفتے باقی رہ گئے ہیں اور اس خونریز کارروائی کا واضح مقصد مصر کو جمہوریت کی طرف سفر کے راستے سے ہٹانا ہے۔

قاہرہ میں ملکی سلامتی کے ذمہ دار اعلیٰ ذرائع نے اے ایف پی کو بتایا کہ دارالحکومت سے شمال کی طرف واقع شہر منصورہ میں مقامی پولیس کے ہیڈ کوارٹرز پر کیے جانے والے اس بم حملے میں اس قدر دھماکا خیز مواد استعمال کیا گیا کہ حملے کے نتیجے میں پانچ منزلہ عمارت کا ایک بڑا حصہ منہدم ہو گیا اور 100 سے زائد افراد زخمی ہو گئے، جن کی اکثریت حملے کے وقت اس عمارت میں موجود تھی۔ اسی لیے ہلاک شدگان اور زخمیوں میں بہت بڑی تعداد پولیس اہلکاروں کی ہے۔

ملکی میڈیا نے متعلقہ صوبے کے گورنر کا حوالہ دیتے ہوئے بتایا کہ اس دھماکے کی آواز 20 کلو میٹر دور تک سنی گئی اور دور دور تک بہت سے مکانوں اور دفاتر کی کھڑکیوں کے شیشے بھی ٹوٹ گئے۔

’اخوان المسلمون دہشت گرد تنظیم‘

منصورہ میں اس دھماکے کے چند ہی گھنٹے بعد مصری وزیر اعظم ببلاوی نے کہا کہ اسلام پسند تحریک اخوان المسلمون ایک دہشت گرد تنظیم ہے۔ اپنے ایک بیان میں ببلاوی نے منصورہ میں تباہ کن بم حملے کی ذمہ داری کھل کر اخوان المسلمون پر نہ ڈالی تاہم اپنے ترجمان کے ذریعے منگل کی صبح یہ بات کھل کر کہی کہ اخوان المسلمون ایک دہشت گرد تنظیم ہے۔

اس سے پہلے بھی مصر میں فوج کی حمایت سے اقتدار میں آنے والی موجودہ حکومت کئی بار اخوان المسلمون پر یہ الزام لگا چکی ہے کہ یہ تنظیم ان دہشت گردوں کو مالی وسائل فراہم کرنے کے علاوہ انہیں تربیت بھی دیتی ہے جو جزیرہ نما سینائی میں ملکی سکیورٹی فورسز پر باقاعدگی سے حملے کرتے ہیں۔

مختلف خبر رساں اداروں کے مطابق وزیر اعظم ببلاوی نے منصورہ حملے کے بعد اخوان المسلمون کو ایک دہشت گرد تنظیم قرار دینے کا جو ذکر کیا، اس کا موجودہ ملکی حکومت کو چند ہفتوں بعد ہونے والے آئینی ریفرنڈم میں سیاسی فائدہ تو ہو سکتا ہے تاہم قانونی طور پر اس بیان سے قاہرہ میں حکمرانوں کو کوئی فائدہ نہیں پہنچے گا کیونکہ اخوان المسلمون کو ایک اعلیٰ مصری عدالت پہلے ہی ممنوع قرار دے کر اس تحریک پر پابندی لگا چکی ہے۔

آج کے حملے کے بعد ملک کے عبوری صدر عدلی منصور نے کہا کہ حکومت نے تہیہ کر رکھا ہے کہ ’دہشت گردی کو دست آہن سے‘ ناکام بنا دیا جائے گا۔

مصر میں جمہوریت کی بحالی کی طرف پہلے بڑے قدم کے طور پر نئے ریاستی آئین کی منظوری کے لیے عوامی ریفرنڈم 14 اور 15 جنوری کو کرایا جائے گا۔