مشرق وسطیٰ تشدد کی آگ کے خطرات سے دوچار

غزہ میں فلسطینی شہریوں کو اجتماعی سزا نہیں ملنی چاہیے تاہم اس کے خطرات بہت زیادہ پائے جاتے ہیں۔ اسرائیل نے حبرون کے قریب تین یہودی لڑکوں کے قتل کے بعد انتقامی کارروائی کا اعلان کر دیا ہے۔ غیظ وغضب اور برہمی بجا ہے اور اس کی وجہ بھی سمجھ میں آتی ہے تاہم جنگ سے اجتناب برتا جانا چاہیے، یہ کہنا ہے ڈوئچے ویلے کے تبصرہ نگار رائنر سولش کا۔

زبانی لے دے تو کافی ہو چُکی ہے۔ اسرائیلی سربراہ حکومت بینجمن نیتن یاہو تین یہودی لڑکوں اور اُن کے حامیوں کے قاتل کو درندہ اور انسانی شکل میں حیوان قرار دے چُکے ہیں۔ ساتھ ہی اس کے سنگین نتائج کی دھمکی بھی دے چُکے ہیں۔ نیتن یاہو کے بقول حماس اس واقعے کی ذمہ دار ہے اور اُسے اس کا حساب چُکانا ہوگا۔ اُدھر حماس نے جوابی دھمکی میں کہا ہے کہ اگر اسرائیل نے غزہ پٹی کے وسیع علاقے پر حملے کیے تو وہ پورے خطے کو جہنم بنا دے گی۔ حقیقت میں ایسا ہی نظر بھی آ رہا ہے، طرفین کے مابین حالات ناقابل تلافی حد تک بگڑ چُکے ہیں۔ کوئی بھی یقین نہیں کر رہا ہے کہ معاملہ پیر اور منگل کی درمیانی شب تین یہودی لڑکوں کی لاشیں برآمد ہونے کے بعد اسرائیل کی طرف سے غزہ پر 30 فضائی حملوں اور حماس کے ایک کارکُن کو ہلاک کیے جانے تک ہی محدود رہے گا۔ انتقام کا جذبہ بہت زیادہ بھڑک چُکا ہے اور اس کا مطالبہ، خاص طور سے نیتن یاہو کے روایتی ووٹ بینک یعنی یہودی آبادکاروں کی تحریک کی طرف اتنا شدید ہے کہ نیتن یاہو علامتی رد عمل تک ہی محدود نہیں رہ سکتے۔ اگر وہ چاہیں بھی تو ایسا نہیں کر سکتے کیونکہ اُن پر داخلی دباؤ بہت زیادہ ہے۔

قتل کا کوئی جواز نہیں

اسرائیل کی طرف سے دباؤ اور غیظ و غضب کا اظہار قابل فہم ہے۔ تین یہودی ٹین ایجرز اور عام شہریوں کا قتل سنگین جُرم ہے اور اس کا کوئی جواز نہیں بنتا۔ نہ تو اسرائیل کی یہودی آبادکاری کی جارحانہ سیاست نہ ہی فلسطینیوں کے خلاف ہونے والے انسانی حقوق کی پامالی کو اخلاقی طور پر وجہ بنا کر پیش کیا جا سکتا ہے۔ یہ بات طے ہے کہ یہ کارروائی ایک بھیانک قتل تھا اور رہے گا جو مبینہ طور پر فلسطینی انتہا پسندوں کا کام ہے، جن کا بنیادی مقصد صدیوں سے اسرائیل اور فلسطین کے مابین پائے جانے والے تنازعے کو مزید طول دینا اور اسے برقرار رکھنا ہے۔ اس امر کو ملحوظ رکھا جانا چاہیے کہ حماس اپنی تمام تر نفرت آمیز بیان بازیوں کے باوجود اسرائیل کے ساتھ رابطے میں رہنا چاہتا ہے اور اسرائیل اب تک کوئی ثبوت پیش نہیں کر سکا ہے۔

#

یہودی لڑکوں کے قتل کے پیچھے کس کا ہاتھ ہے، ہمیں کبھی بھی اس کا علم نہیں ہو سکے گا۔ جب تک غزہ پر اسرائیلی فوجی حملے ہوتے رہیں گے اور زیادہ سے زیادہ فلسطینی شہری اس کا شکار ہو کر ہلاک ہوتے رہیں گے اور دوسری طرف سے اسرائیلی رہائشی علاقوں پر راکٹ برستے رہیں گے، تب تک کوئی بھی اس بارے میں سوال نہیں اُٹھائے گا۔

مشرق وسطیٰ میں تشدد کی آگ کا سلسلہ جاری رہنے کی وجہ فلسطینی عوام میں پائی جانے والی احساس محرومی اور خود کے خلاف ہونے والی زیادتیوں کے سبب نفرت ہے۔ فلسطینی عوام روز بروز ابتر حالات کا سامنا کر رہے ہیں اور ان کی صورتحال ناگفتہ بہ ہے۔ اس سب کا قصور وار تنہا اسرائیل نہیں ہے تاہم اس صورتحال کی ایک بڑی ذمہ داری اُس پر عائد ہوتی ہے