عمران خان نے توشہ خانہ کیس میں سزا کے خلاف اپیل دائر کر دی

پاکستان تحریک انصاف کے چیئرمین عمران خان نے توشہ خانہ کیس میں اپنی سزا کو اسلام آباد ہائی کورٹ میں چیلنج کر دیا ہے۔ عمران کے وکیل نعیم پنجوتھہ کے مطابق سزا کے فیصلے کے خلاف اپیل منگل کے روز دائر کی گئی ہے۔

عمران خان کو ہفتے کے روز ٹرائل کورٹ نے 2018ء سے 2022ء کے دوران اپنی وزارت عظمی کے دور میں سرکاری تحائف کی فروخت پر تین سال قید اور پانچ سال کے لیے انتخابات میں حصہ لینے پر پابندی عائد کر دی تھی۔

 اپیل میں استدعا کی گئی ہے کہ توشہ خانہ کیس میں ٹرائل کورٹ کا فیصلہ خلاف قانون ہے اور یہ کہ اس اپیل پر فیصلے تک سزا معطل کرکے چیئرمین پی ٹی آئی کی رہائی کاحکم دیتے ہوئے انہیں دی گئی سزا کالعدم قراردی جائے۔

جیل تبدیلی کی درخواست پر اعتراضات ختم

 اسلام آباد ہائیکورٹ نےعمران خان کے وکلاء کی جانب سے ان کے مؤکل کی اٹک سے اڈیالہ جیل منتقلی کی درخواست پر رجسٹرار آفس کے اعتراضات ختم کر دیے۔

اسلام آباد ہائیکورٹ کے چیف جسٹس عامرفاروق نے منگل کے روز اس کیس کی سماعت کی، جس دوران عمران خان کے وکیل شیر افضل مروت نے عدالت کے سامنے پیش ہوکر چیئرمین پی ٹی آئی کی طرف سے پاور آف اٹارنی پیش کیا اور کہا کہ جیلوں کے حوالے سے رولز دستیاب ہیں۔

چیف جسٹس عامرفاروق نے کہا کہ جو بھی قانون قاعدہ ہو بتا دیجیے گا، اس کے مطابق آرڈر کر دیں گے۔انہوں نے درخواست گزار کے وکیل کو مخاطب کرتے ہوئے کہا کہ ایک چیز ذہن میں رکھیں، جیلوں کے رولز میں جو سہولت ہے وہی آرڈر کریں گے۔ ان کا کہنا تھا کہ جو وکلا عمران خان سے ملنا چاہتے ہیں ان کا بتا دیں تاکہ اس بارے میں بھی حکم جاری کیا جا سکے۔

ش ر⁄ ع ا (روئٹرز)