شام کی خانہ جنگی میں لبنان کی شمولیت کی نشاندہی

اس علاقے کو پڑوسی ملک لبنان سے شامی باغیوں کے خلاف لڑنے والے رضا کاروں اور ہتھیاروں کی سپلائی کے ضمن میں غیر معمولی اہمیت حاصل ہے۔ سیریئن آبزرویٹری فار ہیومن رائٹس نے آج ہفتے کو القصیر میں ہونے والی گھمسان کی جنگ کو اسد حکومت کے خلاف بغاوت کے آغاز سے اب تک کی شدید ترین جھڑپیں قرار دیا ہے۔

شام کے سرکاری میڈیا کے مطابق شامی صدر بشار الاسد کی فورسز کےساتھ لبنانی ملیشیا گروپ حزب اللہ کی مشترکہ کارروائی میں آج القصیر میں باغیوں کو شکست کا سامنا ہوا ہے اور اسد کی فورسز تیزی سے اس علاقے کو اپنے قبضے میں لے رہی ہیں۔ مبصرین کے مطابق القصیر اسد فورسز کے لیے غیر معمولی اہمیت کا حامل ہے کیونکہ یہ علاقہ دمشق اور بحر روم سے متصل ساحلی علاقوں کے درمیان شام کے لیے ایک کوریڈور کی حیثیت رکھتا ہے اور اس علاقے پر غلبہ اسد حکومت کے لیے بہت اہم ہے۔ سیریئن آبزرویٹری کے مطابق آج ہفتے کو القصیر سے بھاری شیلنگ، راکٹ اور مارٹر گولہ باری کی شدید آوازیں لبنانی سرحدوں تک سنائی دیں۔

اُدھر آج ہفتے کی سہ پہر حزب اللہ کے چیف حسن نصراللہ نے جنوبی لبنان سے اسرائیل کے 22 سالہ قبضے کے بعد مئی سن 2000 میں ہونے والے انخلاء، جسے حزب اللہ اپنی ایک بڑی عسکری فتح سمجھتا ہے، کی یاد میں منائے جانے والے دن کے موقع پر ایک تقریر کی۔ شام میں بغاوت کے آغاز سے اب تک کی حسن نصراللہ کی یہ پہلی تقریر ہے جو انہوں نے شام کی خانہ جنگی میں لبنان کی مداخلت کی واضح نشاندہی کے وقت کی ہے۔

آج القصیر میں ہونے والی جھڑپوں میں کم از کم چار افراد ہلاک ہوئے ہیں۔ اس کی تصدیق ایک لبنانی اہلکار نے نام مخفی رکھنے کی شرط پر کی ہے۔ اس طرح ایک ہفتے کے اندر ہونے والی ہلاکتوں کی تعداد 29 ہو گئی ہے جس میں تین لبنانی فوجی بھی شامل ہیں۔ اس اثناء میں 200 سے زائد کے زخمی ہونے کی اطلاع ہے۔

اُدھر سعودی وزیر خارجہ پرنس سعود الفیصل نے آج ہفتے کو ایک بیان میں کہا کہ شامی بحران کے حل کے لیے مجوزہ امن مذاکرات میں شامی صدر بشار الاسد کو حصہ نہیں لینا چاہیے۔ اُن کا کہنا تھا،’ ہم شامی عوام کی خواہش کا ساتھ دیں گے جس نے واضح طور پر یہ کہ دیا ہے کہ وہ امن مذاکرات میں صدر اسد اور دیگر ایسے عناصر جن کے ہاتھ شامی باشندوں کے خون سے رنگے ہوئے ہیں، کا کوئی کردار دیکھنا نہیں چاہتے‘۔

سعودی عرب کا شمار اُن خلیجی ممالک میں ہوتا ہے جن پر اسد حکومت کا الزام ہے کہ وہ 2011 ء میں امن احتجاجی مظاہروں کی شکل میں شروع ہو کر اب خانہ جنگی کی شکل اختیار کر جانے والی بغاوت میں شامی باغیوں کو ہتھیار فراہم کر رہے ہیں۔

یاد رہے کہ جمعے کو ماسکو میں پریس کانفرنس سے خطاب کرتے ہوئے روسی دفتر خارجہ کے ترجمان الیگزینڈر لوکاشیوِچ نے کہا تھا کہ روس کی درخواست پر بلائی جانے والی جنیوا امن کانفرنس میں دمشق حکومت نے شرکت کی یقین دہانی کرا دی ہے۔

km/ij(AFP,AP)