سعودی ولی عہد کی ایرانی وزیر خارجہ سے ملاقات

خبر رساں ادارے اے ایف پی کے مطابق ایران کے وزیر خارجہ عباس عراقچی کا سعودی عرب کا دورہ ایسے پر وقت ہوا ہے جب ایرانی میزائل حملے کے بعد اسرائیل کسی بھی وقت ایران پر ممکنہ جوابی حملہ کر سکتا ہے۔

تیل کے سب سے بڑے برآمد کنندہ سعودی عرب کا حالیہ برسوں میں تہران کے ساتھ سیاسی میل جول بڑھا ہے، جس سے علاقائی کشیدگی کو کم کرنے میں مدد ملی ہے، لیکن تعلقات اب بھی اطمینان بخش نہیں ہیں۔

حماس اسرائیل تنازعہ: عرب ممالک کہاں کھڑے ہیں؟

مبصرین  کا خیال ہے کہ تہران صورتحال کو پرسکون کرنے کے طریقے تلاش کر رہا ہے۔ خاص طور پر اسرائیل کی جاری دھمکیوں کے درمیان وہ اپنی جوہری تنصیبات کو نشانہ بنائے جانے اور بڑے فوجی تصادم میں شامل ہونے سے بچنے کی کوشش کررہا ہے۔

ایرانی وزارت خارجہ کے ترجمان اسماعیل باغی نے بدھ کو ایکس پر پوسٹ اپنے بیان میں کہا کہ عباس عراقچی سفارتی کوششوں کو آگے بڑھانے کے لیے خلیجی ریاست کے دورہ پر ہیں۔ وہ قطر بھی جائیں گے۔

دورے کا مقصد

ایرانی وزارت خارجہ کے ترجمان نے کہا "اس دورے کا مقصد اسرائیلی حکومت کی جارحیت کو روکنے اور غزہ اور لبنان میں ہمارے بھائیوں اور بہنوں کے درد اور تکلیف کو کم کرنے پر توجہ مرکوز کرنا ہے۔"

ایرانی حملے: کیا اردن اور سعودی عرب نے اسرائیل کی مدد کی؟

مشرق وسطیٰ گزشتہ ہفتے ایرانی میزائل حملے پر اسرائیل کے ردعمل کا انتظار کر رہا ہے، جسے تہران نے غزہ جنگ کے متوازی طور پر چل رہے تنازعہ میں لبنان میں ایران کی حمایت یافتہ حزب اللہ کے خلاف اسرائیل کی بڑھتی ہوئی کارروائی کے بدلے میں کیا تھا۔

ایک سینئر ایرانی اہلکار کے مطابق اس ہفتے کے شروع میں، تہران نے خلیجی عرب ریاستوں کو کہا تھا کہ اگر وہ ایران کے خلاف اپنی فضائی حدود یا فوجی اڈوں کے استعمال کی اجازت دیتے ہیں تو یہ "ناقابل قبول" ہو گا اور خبردار کیا ہے کہ ایسے کسی بھی اقدام کا جواب دیا جائے گا۔

ایرانی وزیر خارجہ کی سعودی ہم منصب سے ملاقات

سعودی عرب کے وزیر خارجہ شہزادہ فیصل بن فرحان نے ریاض کے دورے پر آنے والے اپنے ایرانی ہم منصب عباس عراقچی سے خطے کی صورتحال پر تبادلہ خیال کیا۔

سعودی الاخباریہ چینل نے فوٹیج نشر کی ہے، جس میں شہزادہ فیصل بن فرحان ایرانی وزیر اور ان کے وفد کا استقبال کر رہے ہیں۔

ایرانی وزارت خارجہ کے ایک اہلکار نے کہا کہ دونوں رہنماؤں کے درمیان خطے میں امن کے قیام اور اسرائیل کو حملے بند کرنے پر مجبور کرنے کے حوالے سے بھی بات چیت ہوئی۔

اس دوران ایرانی وزیر خارجہ نے اپنے'ایکس‘ اکاؤنٹ کے ذریعے اپنے دورہ سعودی عرب پر تبصرہ کرتے کہا کہ ان کا ملک اپنے ہمسایہ ممالک کے ساتھ تعلقات کو مضبوط بنانے کے لیے پرعزم ہے تاکہ استحکام اور سلامتی کو یقینی بنایا جا سکے۔

وزیر خارجہ عباس عراقچی کے مطابق ایران کی پالیسی اسرائیل کے قبضے کے خلاف مزاحمت کی حمایت کرنا ہے۔

عباس عراقچی کا کہنا تھا کہ تہران جنگ سے خوف زدہ نہیں اور اس نے بارہا اعلان کیا ہے کہ وہ کشیدگی کو بڑھانا نہیں چاہتا لیکن وہ کسی بھی صورت حال سے نمٹنے کے لیے تیار ہے۔

ج ا ⁄  ص ز ( روئٹرز، اے ایف پی)