امریکی خصوصی مندوب گروسمین کابل میں

ہفتے کےروز گروسمین کی جانب سے ایک بیان میں کہا گیا کہ امریکہ افغانستان میں مفاہمتی عمل کو آگے بڑھانے کے سلسلے میں ہر طرح کا تعاون فراہم کرے گا۔ گروسمین کا دورہ افغانستان ایک ایسے موقع پر ہو رہا ہے، جب طالبان نے اپنے ایک اعلان میں تصدیق کی ہے کہ اس کا ایک نمائندہ دفتر قطر میں قائم ہوچکا ہے۔ اس دفتر کے قیام پر افغان صدر حامد کرزئی نے تشویش کا اظہار کرتے ہوئے کہا تھا کہ افغان حکومت مفاہمتی عمل اور مذاکرات کی حامی ہے تاہم اس دفتر کے قیام کے سلسلے میں افغان حکومت سے مشاورت نہیں کی گئی۔ ماہرین کا خیال ہے کہ امریکی مندوب گروسمین افغان صدر حامد کرزئی سے ملاقات میں ان کے خدشات کے خاتمے کی کوشش کریں گے۔ ایک امریکی عہدیدار نے خبر رساں ادارے اے ایف پی کو بتایا کہ اگر صدر کرزئی طالبان سے امن مذاکرات پر آمادہ ہو گئے، تو یہ مذاکرات اگلے چند ہفتوں میں شروع ہو سکتے ہیں۔

اس سے قبل پارلیمان کے افتتاحی اجلاس سے خطاب کے دوران حامد کرزئی نے کہا کہ ان کی حکومت قطر میں طالبان کے دفتر کے منصوبے پر راضی ہے۔ انہوں نے بتایا کہ ان کی حکومت کے ایک وفد نے افغانستان میں طالبان کے بعد سب سے بڑے عسکری گروپ حزب الاسلامی کے نمائندوں سے بھی ملاقات کی ہے۔ کرزئی کے مطابق یہ ملاقات ’برادرانہ اور انتہائی خوشگوار ماحول‘ میں ہوئی۔

امریکی حکومت کا کہنا ہے کہ طالبان کے ساتھ بات چیت افغان حکومت کی رضامندی کے ساتھ ہی ہو گی۔ مبصرین گروسمین کے دورہ کابل کو اسی سلسلے کی ایک کڑی کے طور پر دیکھ رہے ہیں۔

دوسری جانب فرانسیسی وزیر دفاع Gerard Longuet بھی آج کابل پہنچے۔ افغانستان میں ایک افغان فوجی کی فائرنگ میں جمعے کے روز چار فرانسیسی فوجی ہلاک جبکہ 15 زخمی ہو گئے تھے۔ اس واقعے کے بعد فرانسیسی صدر نکولا سارکوزی نے خبردار کیا تھا کہ فرانس افغانستان سے اپنے فوجیوں کے انخلا کا عمل تیز تر کر سکتا ہے۔ ساتھ ہی فرانس کی جانب سے افغان فوجیوں کے لیے تربیت کے تمام پروگرام بھی معطل کرنے کا اعلان کیا گیا تھا۔

ہفتے کے روز کابل ایئرپورٹ پر صحافیوں سے بات چیت کرتے ہوئے فرانسیسی وزیردفاع نے کہا کہ دراصل یہ ’اعتماد‘ کا قتل تھا۔ انہوں نے بتایا کہ حملہ آور نے غیر مسلح فوجیوں کو ہدف بنایا اور انہیں بچنے کا کوئی موقع ہی نہ مل سکا۔ تاہم انہوں نے اس عزم کا اظہار کیا کہ فرانس افغانستان میں قیام امن کے لیے اپنا بھرپور کردار ادا کرتا رہے گا۔

رپورٹ: عاطف توقیر

ادارت: شادی خان سیف