افغان حکومتی ارکان پر امریکی دباؤ، کابل کی شکایت

افغان دارالحکومت سے موصولہ خبر ایجنسی روئٹرز کی رپورٹوں کے مطابق کابل میں حال ہی میں کئی روز تک جاری رہنے کے بعد اختتام کو پہنچنے والے لویہ جرگہ نے نہ صرف کابل کے واشنگٹن کے ساتھ دوطرفہ سکیورٹی معاہدے کی منظوری دے دی تھی بلکہ ساتھ ہی صدر حامد کرزئی سے یہ سفارش بھی کی گئی تھی کہ وہ اس معاہدے پر دستخط کر دیں۔ لیکن صدر کرزئی نے لویہ جرگہ سے اپنے اختتامی خطاب میں واضح طور پر کہہ دیا تھا کہ وہ فی الحال امریکا کے ساتھ اس معاہدے پر دستخط نہیں کریں گے۔

یہ دوطرفہ معاہدہ افغانستان میں 2014ء کے بعد بھی، جب اتحادی فوجی دستے ہندوکش کی اس ریاست سے رخصت ہو چکے ہوں گے، امریکی فوجی دستوں کی افغانستان میں موجودگی اور ان کے ممکنہ اختیارات اور فرائض کے بارے میں ہے۔

اس سلسلے میں افغان صدر حامد کرزئی کے ترجمان ایمل فیضی نے خبر ایجنسی روئٹرز کو ای میل کیے گئے اپنے ایک بیان میں جمعے کی شام کہا کہ اس میں کوئی شک نہیں کہ کابل حکومت میں شامل مخصوص عناصر کو امریکی دباؤ کا سامنا ہے تاہم اس دباؤ سے کچھ حاصل نہیں ہو سکے گا۔

ایمل فیضی نے کہا، ’’ اگر واشنگٹن میں یہ تاثر پایا جاتا ہے کہ کابل میں چند مخصوص حکومتی عناصر صدر کرزئی کو اس بات پر مجبور کر سکیں گے کہ وہ اپنے اوپر دباؤ کے آگے ہتھیار پھینکتے ہوئے امریکا کے ساتھ دوطرفہ سلامتی معاہدے پر دستخط کردیں گے، تو یہ تاثر سراسر ناقص اور غلط ہے۔‘‘

اس بارے میں جب روئٹرز نے وضاحت کے لیے کابل میں امریکی سفارت خانے سے رابطہ کیا تو رابرٹ ہلٹن نامی ترجمان نے افغان صدارتی ترجمان ایمل فیضی کے بیان پر کوئی بھی تبصرہ کرنے سے انکار کرتے ہوئے صرف یہی بات دہرائی کہ واشنگٹن کی رائے میں دوطرفہ سکیورٹی معاہدے پر جلد دستخط کر دینا دونوں ملکوں کے مشترکہ مفاد میں ہے۔

امریکا کو کابل کے ساتھ اس معاہدے کے حتمی طور پر طے پا جانے کی جلدی اس لیے ہے کہ 2014ء کے آخر تک افغانستان سے تمام اتحادی فوجی دستے نکل جائیں گے اور واشنگٹن چاہتا ہے کہ اگر اس کے فوجی دستے اگلے سال کے بعد بھی افغانستان میں متعین رہیں گے تو امریکا کے پاس ضروری اقدامات کے لیے کافی وقت ہونا چاہیے۔ اس وقت افغانستان متعینہ امریکی فوجیوں کی تعداد 47 ہزار بنتی ہے اور امریکا کی خواہش ہے کہ دوطرفہ سکیورٹی معاہدہ یا BSA طے پا جانے کے بعد وہ 2015ء سے ہندوکش کی اس ریاست میں اپنے قریب آٹھ ہزار تک فوجی متعین رکھے۔

واشنگٹن کی طرف سے یہ بھی کہا جا چکا ہے کہ اگر کابل کے ساتھ یہ معاہدہ طے نہ پا سکا تو امریکا 2014ء کے آخر تک افغانستان سے اپنے تمام فوجی واپس بلا لینے کا فیصلہ بھی کر سکتا ہے۔ روئٹرز کے مطابق یہ معاہدہ طے نہ پا سکنے کی صورت میں مغربی دنیا کی طرف سے افغانستان کو ملنے والی اربوں ڈالر کی امداد کی فراہمی بھی غیر یقینی ہو جائے گی اور یہ پیش رفت افغانستان کی پہلے ہی سے بدحال معیشت کے لیے انتہائی نقصان دہ ہو گی۔