افغان امریکا سکیورٹی ڈیل، انتظار کیا جا سکتا ہے: جنرل ڈیمپسی

خبر رساں ادارے روئٹرز نے چیئرمین جوائنٹ چیفس آف اسٹاف جنرل مارٹن ڈیمپسی کے حوالے سے بتایا ہے کہ امریکا اور افغانستان کے مابین دو طرفہ سکیورٹی کے معاہدے کو حتمی شکل دینے کے لیے اگرچہ انتظار کیا جا سکتا ہے لیکن اس سے نہ صرف افغان سکیورٹی فورسز کے اعتماد کو نقصان پہنچے گا بلکہ اس سے نیٹو کی منصوبہ بندی بھی متاثر ہو گی۔

جنرل ڈیمپسی کا یہ بیان ایسے وقت میں سامنے آیا ہے جب افغان صدر حامد کرزئی آئندہ برس اپریل سے قبل اس معاہدے پر دستخط نہ کرنے کے اپنے فیصلے پر برقرار ہیں۔ اسی معاہدے کو حتمی شکل دینے کے بعد کچھ نيٹو افواج 2014ء کے بعد بھی افغانستان میں تعینات رہ سکیں گی، ورنہ دوسری صورت میں آئندہ برس کے اختتام تک تمام غیر ملکی فوجی افغانستان سے واپس اپنے اپنے ممالک روانہ ہو جائیں گے۔

یہ امر اہم ہے کہ افغان صدر کے اصرار کے باوجود امریکی صدر باراک اوباما کی انتظامیہ کا کہنا ہے کہ کابل اور واشنگٹن کے مابین یہ اہم معاہدہ رواں برس کے دوران ہی طے پا جانا چاہیے۔ اس صورتحال میں جنرل ڈیمپسی نے بھی بدھ کے دن پینٹاگون میں صحافیوں کو بریفنگ دیتے ہوئے کہا کہ اس معاہدے کو فوری طور پر حتمی شکل دے دینا چاہیے۔

تاہم ان کا کہنا تھا کہ اس معاہدے میں تاخیر سے مستقبل کی منصوبہ بندی کرنے کے لیے امریکی افواج کو کسی انتظامی مسئلے کا سامنا نہیں ہے لیکن اس مرحلے میں دیگر کئی معاملات حل طلب ہیں۔ انہوں نے خبردار کیا کہ کئی اتحادی ممالک کو افغانستان میں اپنی افواج کی تعیناتی کے لیے پارلیمانی اجازت لینا ہو گی اور اگر دوطرفہ سکیورٹی کے معاہدے پر دستخط کرنے کے عمل میں دیر کی جاتی ہے تو انہیں مسائل کا سامنا ہو سکتا ہے۔

اعلیٰ امریکی فوجی اہلکار نے مزید کہا کہ افغان سکیورٹی فورسز کو ابھی بھی طالبان کی سخت بغاوت کا سامنا ہے۔ جنرل ڈیمپسی کے بقول اس معاہدے پر کسی فیصلے کو مؤخر کرنے کے نتیجے میں افغان سکیورٹی فورسز کو بھی یہ معلوم نہیں ہو گا کہ آیا ہم ان کی مدد کے لیے ان کےساتھ رہیں گے یا نہیں اور یوں مقامی سپاہیوں کا اعتماد متزلزل ہو سکتا ہے۔ انہوں نے کہا، ’’یہ معاہدہ جلد ازجلد طے کرنے کی ضرورت ہے کیونکہ افغانستان کو اعتماد کی ضرورت ہے۔‘‘ افغانستان میں اس وقت بھی تقریبا 46 ہزار امریکی فوجی تعینات ہیں، جو آئندہ برس کے آغاز پر کم کر کے 34 ہزار کر دیے جانے کا منصوبہ ہے۔

ادھر امریکی وزیر خارجہ جان کیری نے بھی اس ڈیل کو فوری طور پر حتمی شکل دینے کی ضرورت پر زور دیتے ہوئے کہہ دیا ہے کہ اگر افغان صدر کرزئی اس پر دستخط نہیں کرنا چاہتے ہیں تو افغان وزیر دفاع بسم اللہ خان محمدی ان کی جگہ اس معاہدے پر دستخط کر سکتے ہیں۔ تاہم افغان صدر کے ایک ترجمان نے کہا ہے کہ حامد کرزئی اپنے کسی وزیر کو اس معاہدے پر دستخط کرنے کی اجازت اس وقت تک نہیں دیں گے جب تک ان کی اہم شرائط تسلیم نہیں کر لی جاتیں۔