Ndoto ya robo fainali ya Dortmund yazimwa na Chelsea

Safari ya klabu inayoshiriki Ligi Kuu ya Ujerumani Bundesliga, Borussia Dortmund katika ligi ya mabingwa barani Ulaya imefika mwisho katika hatua ya 16 bora baada ya kuondolewa katika mashindano hayo na Chelsea.

Katika mechi iliyochezwa uwanjani Stamford Bridge huko mjini London, Chelsea waliingia uongozini kupitia kwa Raheem Sterling halafu Kai Havertz akaongeza goli la pili kupitia mkwaju wa penalti uliokuwa na utata ambao alilazimika kuupiga mara mbili.

Dortmund waliwasili katika mechi hiyo wakiwa kifua mbele kwa goli moja baada ya kupata ushindi katika mechi ya raundi ya kwanza. Miamba hao wa Ujerumani walikuwa katika msururu wa mechi kumi bila kushindwa mashindano yote wanayoshiriki.