Mashirika yafuta safari za ndege kwenda na kutoka Beirut

Hali hiyo imesababishwa na kuongezeka kwa mivutano kati ya Israel na kundi la kisiasa la wanamgambo la Hezbollah.

Shirika la ndege la Lufthasa limefahamisha leo Jumatatu kwamba limefuta safari zake tano za kuelekea na kutoka mjini Beirut zinazohusisha mashirika yake ya ndege ya Swiss Airlines, Eurowings na Lufthansa, kwa ajili ya kuchukua tahadhari.

Soma pia: Kundi la Hezbollah ladai kuishambulia Israel kwa roketi

Mwishoni mwa wiki shambulio la roketi lilisababisha vifo vya vijana 12 na watoto katika eneo la milima ya Golan na tukio hilo limeongeza wasiwasi kwamba Israel na kundi hilo la Hezbollah linaloungwa mkono na Iran huenda wakaingia katika vita kamili.

Jana baraza la mawaziri linalohusika na usalama la Israel liliidhinisha serikali kujibu shambulio hilo la milima ya Golan.