وسله والو برید کوونکو ۱۱ پاکستاني پولیس وژلي دي
۱۴۰۳ شهریور ۲, جمعه
په دغه بريد کې یو شمېر پاکستاني پولیس ټپیان دي او د پولیسو دوه زغروال موټر هم سوځېدلي دي.
د ځایي پولیسو مشر بابر سعید ویلي، دا برید د جمعې په شپه د پنجاب ایالت د سند سیند پر غاړه شوی دی. برید په داسې ځای کې شوی چې لویه برخه یې د قبایلي ډلو تر کنټرول لاندې ده.
د پولیسو یوه بل چارواکي احمد مختار زیاته کړې ده چې په دغو دوو زغره والو موټر کې لږ تر لږه ۲۰ تنه پولیس سپاره ول چې په یوه موټر کې د تخنیکي ستونزې له امله دغه کاروان ودرول شو.
دغه پوليس چارواکي همدا راز زياته کړې ده چې د دغه وسله والو ډلو د ډزو په نتيجه کې دواړه موټرې سوځېدلي دي. ويل کيږي چې په دغه بريد کې اووه پولیس ټپيان شوي هم دي.
په پنجاب ایالت کې د سند سیند په اوږدو کې څو سوه جریبه ځمکه د وران کارو ډلو په ولکه کې ده. د سند سیند له همالیا څخه عربي بحیرې ته بهېږي.
د پولیسو په حواله چې دغه وسله والې ډلې په قتل، تښتونو، زورزياتي او د لويې لارې په غلاوو کې لاس لري.
دغه ډلې د «ار پي جی» راکټ او کلاشینکوف په ګډون مختلفې وسلې له تورو بازارونو او هغه شبکو څخه اخلي چې د افغانستان او پاکستان ترمنځ د سيمي په اوږدو کې فعالیت کوي.
که څه هم د پاکستان امنیتي ځواکونه د څو عملیاتو په ترسره کولو سره توانېدلي ول چې په موقت ډول د یادې سیمې کنټرول ترلاسه کړي، خو دغه وسله والې ډلې له هر عملیاتو وروسته خپلې ډلې نوې کوي.