«د افغانستان د گاونډیو هیوادونو په مرسته د افغانانو اخراج»

په آلمان کې له سوسیال ډیموکراټ گوند (SPD)  غړې د جرمني د کورنیو چارو وزیرې نانسي فیزر د«Neuen Osnabrücker Zeitung» په نامه آلمانۍ ورځپاڼې ته په خبرو کې ویلي چې «موږ په محرمانه ډول له بیلابیلو هیوادونو سره په اړیکه کې یو ترڅو داسې لارې چارې پیدا کړو چی له مخې یې افغانستان ته  د مهاجرو اخراج ممکن سي.»

د آلمان د کورنیو چارو وزیرې نانسي فیزر زیاته کړې چې هغه به په پوتسدام کې له چارشنبې تر جمعې ورځې  پورې د آلمان د ایالتونو د کورنیو چارو وزیرانو په غونډه کې دغه خبره واضح وکړي.

فیزر یادې ورځپاڼې ته په خپلو خبرو کې زیاته کړه: «موږ په جدي ډول پردې کارکوو چې افغانستان ته د اسلامپاله خطر پیښوونکو  او جنایتکارو کسانو اخراج بیرته عملي کړای سو. زما له پاره د آلمان امنیت په ښکاره ډول لومړیتوب لري. هدف دا دی چې هغه مجرم کسان چې د یوه جرم له کولو وروسته بیرته آزادیږي، باید په دوامداره توگه اخراج سي او موږ غواړو اسلامپاله خطر پیښوونکي په دوامداره توگه بیرته واستوو.»   

د جرمني په منهایم کې د (پکس اروپا) په نوم د اسلام منتقدې پر ډلې باندې د یوه افغان له خوا د چړې تر برید وروسته، چی له امله یې یو پولیس مړ سو، په دغه هیواد کې یو وار بیا، جگړه ځپلو او بحراني هیوادونو ته د مهاجرو د اخراج موضوع توده سوې ده. په آلمان کې افغانستان ته لا د نامعلوم امنیتي وضعیت له امله د رد شویو مهاجرو د اخراج موضوع شخړه اییزه ده دا ځکه چې آلمان په افغانستان کې له واکمنو طالبانو سره دپلوماتیکي اړیکې نه لري. له همدې کبله فیزرغواړي د افغانستان د گاونډیو هیوادونو په مرسته د افغان مهاجرو اخراج ممکن کړي.

GP/KH/AG