المان: په يوه مهاجر کمپ کې اور لګیدنه رامنځته شوې
۱۴۰۳ تیر ۱۹, سهشنبه
د دوشنبې په ورځ (۲۰۲۴م کال د جولای میاشتې ۸) د المان د نیدرزاکسن ایالت د بوخهولڅ ښار په نورهایده سیمه کې د پناه غوښتونکو په یوه کمپ یا استوګځای کې د یوې چاودنې له امله د اور لګیدنې په پایله کې یو کس وژل شوی دی.
د نیدرساکسن ایالت د کورنیو چارو وزارت په وینا په دې پېښه کې ۲۰ کسان ټپیان شوي هم دي چې د یوه پولیس ټپونه جدي ښودل شوي دي.
د اور لګیدنې د مهارولو او ژغورنې عملیات د دوشنبې تر غرمې وروسته پای ته ورسیدل. د اورلګیدنې د خطر په اړه د خبر ترلاسه کولو سمدستي وروسته پولیسو د پيښې ځای ته ځان ورسولو.
د پولیسو په حواله یو پولیس او یوه همکاره یې د پناه غوښتونکو د استوګنځای له دوو کارمندانو سره یوځای د پناه غوښتونکو دغه استوګنځای ته ور ننوتل چې د پترولو بوی پکې احساس کیده. لږ وروسته په ناببره توګه د چاودنې غږ واوریدل شو او په پایله کې یې اورلګیدنه رامنځته شوه.
د پولیسو د معلوماتو له مخې، د شدید ټپي شوي پولیس ترڅنګ د هغه یوه همکاره، د استوګنځای یو کارمند او همدارنګه په دغه ودانۍ یو شمېر نارينه او ښځي اوسیدونکي [پناه غوښتونکي] ټپیان شوي دي. د یوه کس مړی موندل شوی دی چې هویت یې تر اوسه پورې نه دی تثبیت شوی.
د ژغورنې عملې د معلوماتو له مخېپه دې ساختمان کې د استوګني ۳۰ کانتینرونه موجود دي. د نیدرزاکسن ایالت د کورنیو چارو وزیرې دانیلا بیرنز، د یوې ویروونکې پيښې خبره کړې ده.
تر اوسه پورې د دې پيښې د رامنځته کیدو علت معلوم نه دی. پولیس او د اور وژنې څارونکي په دې اړه څېړنې کوي.
آژانسونه: ش.ن/ ن.ز