کابل کې د ازبکستان له صدراعظم څخه د طالبانو تود هرکلی
۱۴۰۳ مرداد ۲۸, یکشنبه
له درو کلونو راهیسې چې طالبان پر افغانستان بیا واکمن شوي دا کابل ته د یو لوړپوړي بهرنی چارواکي له لوري دوهم سفر دی چې ترسره کيږي. د آلمان خبري آژانس دغه سفر په خپل رپوټ کې د یو مهم دیپلوماتيک اقدام په توګه یاد کړی دی.
د طالبانو د رئيس الوزرا مرستیال، عبدالسلام حنفي د ازبکستان د صدراعظم مخې ته د کابل نړېوال هوايي ډګر ته ورغلی وو. طالبانو په هوايي ډګر کې د عارف اوف مخې ته د سره فرش په هوارولو هرکلی وکړ.
د طالبانو د صنعت او سوداګرۍ وزارت په یوه اعلامیه کې، کابل ته د ازبکستان د صدراعظم د سفر موخه پر دوه اړخیزو روابطو خبرې اترې او د افغانستان او ازبیکستان تر منځ د تجارتي اړیکو پراختیا ښودلې ده.
دغه وزارت زیاته کړې چې دواړو هېوادونو د سوداګرۍ او پانګونې پنځه تړونونه لاسلیک کړل. زیاته شوې چې عارف اوف به د ازبک تولیداتو یوه نندارتون افتتاح هم وکړي.
دغه سفر په افغانستان کې د حاکمو طالبانو، ازبکستان او آزربایجان هیوادونو د اقتصاد وزیرانو تر ېوې درې اړخيزې غونډې وروسته ترسره کيږي. د اقتصاد وزیران په دغه غونډه کې د سیمیزې سوداګرۍ د تقویت پر لارو چارو غږېدلي ول.
د طالبانو د رئيس الوزار اقتصادي مرستیال ملا عبدالغني برادر له ازبک پلاوې سره د کتنې پر وخت وويل چې افغانستان او ازبکستان په خپلو کې ګډ مذهبي او کلتوري مشترکات لري: «ازبکستان هم د یو ګاونډي ورور هېواد په توګه د افغانانو په زړه کې ځانګړې ځای او ديني او کلتوري، قومي او ژبني مشترکات سره لري.»
ازبکستان د افغانستان شمالي ګاونډۍ دی. دواړه هېوادونه ۱۴۴ کیلومتره ګده پوله لري. په بلخ ولایت کې ازبکستان سره د حېرتان بندر، د منځنۍ آسیا هېوادونو سره د افغانستان یو له مهمو بندرونو څخه ګڼل کيږي. د تېرو درو کلونو په جریان کې چې طالبان پر افغانستان بیا واکمن شوي، ازبکستان د طالبانو له حکومت سره ښې سیاسي اړېکې ساتلي دي.
طالبانو سره يو شمېر نور هېوادونه هم خپل تعاملات لري، خو تر اوسه د نړۍ هېڅ هیواد د طالبانو حکومت په رسمیت نه دی پېژندلی.
(dpa/x)/م.ک.ص./ا.ا.