له غزې د ولسي وګړو اېستلو ته د ملګرو ملتونو غبرګون
۱۴۰۲ مهر ۲۲, شنبه
رپوټونه وايي، اسرائیلو د غزې شمال کې شاوخوا ۱.۱ میلیونه ولسي وګړو ته ژر تر ژره د وتلو امر کړی. اسرائیلو ویلي د حماس وسله واله ډله د غزې تړانګې په شمالي برخه کې پټنځایونه لري چې ښايي ځمکني برېدونه پرې پيل شي.
د ملګرو ملتونو عمومي منشي انتونیو ګوترش پر خپله اېکس پاڼه لیکلي چې د فلسطینیانو مشروع نارضایتی په رسمیت مني، خو دا ملاتړ د ترهګریزو کړنو، وژنو او د ولسي خلکو برمته کول نه توجیه کوي.
هغه زیاته کړې: «د غزې له یوې جګړیزې سیمې چې تر محاصرې لاندې ده د ۱.۱ میلیون خلکو یوې بې اوبو، بې خوړو او بې امکاناتو سیمې ته ورلېږدول خورا خطرناک او په ساده ډول ممکن نه دي.»
اسرائیلوخبرداری ورکړی چې غزه به ترهغې د هغوی تر کلابندۍ لاندې وي ترڅو چې حماس ډلې د هغوی ۱۵۰ یرغمل شوي اسرائیلیان نه وي خوشې کړي.
ګوتریش زیاتوي چې د ملګرو ملتونو کارکوونکي د غزې خلکو سره د مرستو له پاره کار کوي او باید غزي ته بیړنی بشري لاسرسی ولري. د هغه په خبره «مونږ به په دې سره اړمنو ته سون توکي، خواړه او اوبه ورسوو.»
د مالوماتو له مخې په غزې تړانګه کې د حماس وسله والې ډلې او اسرائیلي ځواکونو ترمنځ جګړه کې تراوسه له دواړو غاړو څه کم څلور زره کسان وژل شوي دي.